Мине “Башҡортостан” кеше итте!

“Башҡортостан” гәзите тиһәм, шунда уҡ күңел яҡтырып китә! Бик ҡәҙерле, йө­рәккә яҡын, изге урын ул. Ижад юлындағы тәүге уңыштарым, шатлыҡ-ҡаҙа­ныш­тарым да тап “Башҡортостан”ға бәйле. “Мине “Башҡортостан” кеше итте!” – тип әйтһәм дә, һис шаштырыу булмаҫ.

Башҡорт дәүләт университе­тының бишенсе курсында уҡып йөрөгәндә әҙәбиәт һәм мәҙәниәт бүлегенә  эшкә алдылар.  Шат­лығымдың сиге юҡ ине! Беренсенән, редакцияла бере­һенән-береһе абруй­лыраҡ журналистар, киң танылған яҙыу­сылар менән бергә эшләү оло бәхет ине.

Икенсенән, ижади сәфәрҙәр, ҡыҙыҡлы кешеләр менән осра­шыуҙар күңелемде байытҡандан-байытты.  Редакция үҙе умарта иләүе кеүек гөрләп тора! Көн дә тиерлек ҡыҙыҡлы ҡунаҡтар килә. Бынан тыш, йыл дауамында Башҡортостанды арҡыры-буйға йөрөп сығабыҙ. Тынғыһыҙ, билдәле журналистар, яҙыусылар менән ижади мөхиттә бергә эшләү мине лә әҙәбиәт донъяһына алып килгәндер.  2012 йылда “Ҡалдырма, әсәй!” тигән тәүге күләмле әҫәремде “Башҡортостан” гәзите редакцияһында эшләгән саҡта яҙҙым.

Бөгөн дә “Башҡортостан”, үҙ асылына тоғро ҡалып, хал­ҡыбыҙға, туған телебеҙгә арымай-талмай хеҙмәт итә. Заман башҡа, заң башҡа, тигәндәй, ижади эш алымдары ла үҙгәрә. Бөгөн күпселек халыҡ үҙ телендә мәғлүмәтте интернет аша ала. Был йәһәттән бер быуатлыҡ баҫмабыҙ бүтәндәргә өлгө күрһәтә. Бөгөн “Башҡортостан” гәзите – интернет киңлектәрендә иң күп уҡыусыһы булған республика баҫмаһы. Үҙе бер ғорурлыҡ! Шул уҡ ваҡытта баҫма варианты ла юғары зауыҡ менән, тәрән мәғәнәле итеп сығып килә. Тә­рәндән уйлап ҡараһаң, “Баш­ҡортостан” – ул ябай мәғлүмәт сығанағы ғына түгел, ә халҡыбыҙ, телебеҙ йәшәйешенең, ил-йортобоҙ барлығының сағыу символы.

Шағир Евгений Евтушенконың ошондай шиғри юлдары бар:

“Если будет Россия, значит, буду и я”.

Ошо юлдарҙы үҙебеҙсә әйт­кәндә, Башҡортостаныбыҙ бул­ғанда, “Башҡорт­остан” гәзитебеҙ сығып килгәндә, беҙ ҙә йә­шәйәсәкбеҙ!

Мәңге йәшнә, “Башҡортос­тан”ым!

- Айгиз Баймөхәмәтов, “Шоңҡар” республика йәштәр журналының баш мөхәррире