Башҡортостан
-26 °С
Болотло
VKOKРУС
Бөтә яңылыҡтар

“Ҡулыңдан эш килә”

Бөгөн дә гәзиткә тоғро.

20 йылдан ашыу ғүмерен матбуғатҡа арнаған, үҙенсәлекле яҙыу стиленә эйә билдәле журналист, Башҡортостандың атҡаҙанған матбуғат һәм киң мәғлүмәт хеҙмәткәре Нурия Амангилдина ла олпат баҫмабыҙ – “Башҡортостан” гәзите мәктәбен үткән журналист.

“Башҡортостан” гәзитенә Нурия Амангилдина корректор вазифа­һында килеп инә. Корректор булһа ла, гәзиттең ул мәлдәге баш мөхәррир уранбаҫары Марсель Ҡотлоғәлләмовтың, “Әҙәбиәт, мәҙәниәт һәм мәғариф” бүлеге мөдире Сабир Шәриповтың ҡала кимәлендәге сараларҙы яҡтыртыу буйынса биргән махсус заданиеларын бар күңелен һалып баш­ҡара. Йыл ярымдан ул, ниһайәт, күптәнге мораҙына ирешә – уны гәзиттең “Мәғлүмәт” бүлегенә хәбәрсе итеп күсерәләр. Ә был бүлек, әлбиттә, теүәллекте, етеҙлекте ярата. Амангилдинаны бүлеккә журналист итеп күсергәндә уның тап шул егәр­лелегенә, эште гелән йүгереп йөрөп башҡа­рыуына иғтибар иткәндәрҙер ҙә, моғайын.

Нурия Амангилдинаның редак­ция­ның “Мәғариф”, “Мәҙәниәт”, “Хаттар” бүлектәрен­дәге хеҙмәтен, ошо өлкәләрҙәге тормошто уҡымлы, ентекле итеп сағылдырған яҙма­ларын Башҡортостан Матбу­ғат һәм киң мәғлүмәт, Халыҡ мә­ғарифы министрлыҡ­тары, Журналистар союзы, Өфө ҡалаһы мәға­риф идаралығы ла юғары баһа­ланы, Почет грамоталары, маҡтау ҡағыҙҙары менән бүләк­ләне. Абруйлы ҡәләм оҫталары, журналистар Рәүеф Насиров, Дәүләт Мәһәҙиев, Марсель Ҡотло­ғәллә­мов, Аҡмал Саптаров, шағирҙар Риф Тойғонов, Хәсән Назар, яҙыу­сы Сабир Шәриповтар менән бергә эшләү бәхетен дә яҙмыш бүләге тип иҫәпләй Нурия апай.

“Айырыуса ҡәләмдәшем Зөһрә Ҡотло­гилдина, осраған һайын, әйҙә, күберәк яҙыш әле һин, тип күңелде күтәреп ебәрер ине. Марсель Ҡотлоғәлләмов иһә, журналға китеп эшләй башлаған еремдән, һин гәзит кешеһе, һин үҙебеҙгә кәрәк, тип гәзиткә кире ҡайтарып алды. Элекке баш мөхәрриребеҙ Тәлғәт Сәғитовҡа ла йылы кәңәштәре өсөн бурыслымын. Уның: “Һин булдыра алаһың бит ул, Нурия, ҡулыңдан бөтә эш килә”, – тигән һүҙҙәре әле булһа иҫемә төшөп, күңелемә ҡанат ҡуя.

Ғәҙәттә, пенсияға сыҡҡанда ҡайһы берәүҙәр үҙенең киләсәген күҙ алдына ла килтерә алмай, артабан нишләргә, тип албырғабыраҡ ҡала. Нурия апай һис аптырап ҡалмай. Тәбиғәттән ҡыҙыҡһы­ныусан холҡо уны, инде хаҡлы ялға әҙерләнгән кешене, яңы һө­нәрҙәр үҙләштереүгә этәрә. Шулай итеп, Нурия Амангилдина тегенсе, массаж яһаусы, хатта юрист һө­нәренә лә уҡып ала. “Әлбиттә, тормошта миңә был һөнәрҙәрем ярҙам итмәй ҡалманы. Күлдәктәр ҙә тегеп кейҙем, оҙаҡ ҡына сирлә­гән әсәйемә массаж яһап, быуындарын йомшарттым, хоҡуҡи белемемде лә көндәлек тормошта юҡ-юҡта ҡулланып ҡуям. Әммә журналист журналист инде, барған, уҡыған бар еремдә буласаҡ материалдарыма геройҙар барлайым. Тағы ла бик күп үҙенсәлекле яҙмыш­лы кешеләр­ҙең исемдәрен яңғыратҡы килә республи­каға”, – ти ул.

Бөгөн дә үҙенең гәзитенә тоғро Нурия апай. “Башҡортостан”ды уҡымай ҡалған көнөм юҡ. Йәш журналистар гәзиттең элекке традицияларын, ғөрөф-ғәҙәттәрен юғалт­ма­һын, етеҙ, хәрәкәтсән булһын. Журналист бүлмәлә генә ултырып эшләргә тейеш түгел бит, шуны онотмаһындар. Эҙләнһендәр, донъя күрһендәр, ил гиҙһендәр. Гәзиттә эшләү дәүеремдә миңә республикала ғына түгел, Ырымбур, Пермь өлкәләренә, Мәскәү, Ҡазан, Түбәнге Тагил ҡалаларына ла коман­дировкаларға барып, ундағы әһәмиәтле сараларҙы яҡтыртырға насип булды, шуға ҡыуанам”, – ти ул.

Ғүмер ҙә – оло сәйәхәт, Нурия апай. Сәйәхәтегеҙ артабан да матур тәьҫораттарға бай булһын, юлығыҙҙа үҙегеҙ кеүек алсаҡ, ярҙамсыл кешеләр осрап торһон!

-  Наилә НУРҒӘЛИНА

 

Читайте нас в