Һабантуйға килегеҙ!

Һабантуйҙа Башҡортостан сәнғәт оҫталарының, башҡорт эстрада йондоҙҙарының концерттары күрһәтелә, ижади коллективтарҙың сығыштары нон-стоп режимында уҙғарыла. Майҙансыҡта тирмәләр менән “Башҡорт милли биҙәге” фольклор ауылы йәйелдереләсәк, унда ҡунаҡтар башҡорттарҙың мәҙәниәте, йолалары менән таныша ала: торлаҡ йыһаздары, көнкүреше, халыҡ кәсептәре, костюмдары, милли аш-һыуҙары сағылдырыла. Ихата биләмәһендә интерактив майҙансыҡтар ҙа эшләйәсәк: солоҡсолоҡ, тимерселек эше, башҡорт биҙәүестәрен эшләү, декоратив сәнғәт, халыҡ уйындары урын аласаҡ. Башҡортостанды быйыл Ишембай һәм Ҡырмыҫҡалы райондары күрһәтә.

Фольклор ауылы ҡунаҡтары 100-әр  йыл элек булған башҡорт тирмәһенең йыһаздарын күрә аласаҡ һәм башҡорттарҙың тарихы менән таныша аласаҡ. Шулай уҡ Мәскәү һабантуйында беренсе тапҡыр "Бәйге“ башҡорт күп йүнәлешле көрәш  буйынса ярыштар ҙа ойоштороласаҡ.

 Мәскәү һабантуйында Ф.Ғәскәров исемендәге халыҡ бейеүҙәре дәүләт академия ансамбле, “Хазина” этно-проекты, “Дәрүишхан” төркөмө, “Бишбармаҡ” оркестры, Башҡортостан Республикаһының атҡаҙанған артистары Рөстәм Шаһыбалов, Диана Ишниязова, Азат Биҡсурин (ҡурай), Халыҡ-ара һәм Бөтә Рәсәй конкурстары лауреаттары Алмас һәм Рәфис Сирусиндар, Тимур Рамазанов, Салауат Мөхәмәдйәров, Марат Фәйзуллин, Зилиә Бәхтиева, Гөлшат Ғирфанова, Илдар Абдуллин, Әлфиә Ниғмәтуллина һәм башҡалар сығыш яһаясаҡ.

Һабантуй байрамын уҙғарыу башҡорт мәҙәниәтен, башҡорт халҡының йолаларын һаҡлау, мәҙәниәт өлкәһендә хеҙмәттәшлекте нығытыуға маҡсатланған.

 Мәскәү һабантуйы – Мәскәү халыҡтарының байрамы. Был майҙансыҡта йыл һайын 250 меңдән ашыу кеше була. “Һабантуй-2022” илебеҙҙең мәҙәни һәм рухи йолаларының берҙәмлеген күрһәтә.

 Йыл һайын Мәскәүҙә уҙғарылған Һабантуй үҙенең сиктәрен киңәйтә, уны ҡарарға теләүселәр һаны ла арта, шулай уҡ балаларына халыҡ йолаларын күрһәтеп үҫтереүселәр ҙә күбәйә. Мәскәүҙәге күләмле сараларҙың береһе - һабантуйҙа дөйөм ғаилә байрамы мөхите  тойола.

 Һабантуй 11 сәғәттә башлана. Тантаналы асыу  13.00 сәғәткә билдәләнгән. Мәскәү ҡалаһы, Андропов проспекты, 39-сы йорт, “Коломенское” метроһы станцияһы адресы буйынса  байрамды күрергә мөмкин.  Инеү ирекле.