Ғаилә байрамына килегеҙ!

Башҡортостан Республикаһының Милли музейы иртәгә, 8 июлдә Бөтә донъя ғаилә, мөхәббәт һәм тоғролоҡ көнөнә арналған байрам сараларына саҡыра. Ғаилә байрамы «Ныҡлы ғаилә – ил терәге!» тип аталған Республика музей акцияһына ярашлы үткәрелә. Был көндө ғаиләләр музейға бушлай инә ала, тип хәбәр итә учреждение үҙ төркөмөндә.

Байрам сәғәт 11-ҙә ғаилә һабантуйы менән асыла. Музей ихатаһында төрлө уйындар, ярыштар ойошторола. «Бал ҡорто ғаиләһе», «Өләсәйҙең һандығы» саралары, башҡорт ҡатын-ҡыҙҙары биҙәүестәрен, ҡағыҙҙан аҡ сәскә, үләндән башҡорт милли музыкаль ҡоралы – ҡурайҙы эшләү буйынса оҫталыҡ дәрестәре үтә.

Был көндә ике тапҡыр Советтар Союзы Геройы Муса Ғайса улы Гәрәевкә арналған «Муса Гәрәев – яугир һәм гражданин» тип исемләнгән күргәҙмә лә асыла, ҡунаҡтарға Геройҙың ғаиләһе тураһында экскурсия тәҡдим ителәсәк. Бынан тыш, «Башҡортостан Республикаһы халыҡтарының этнографияһы» залында «Башҡортостан Республикаһы халыҡтарының ғаилә традициялары» тип аталған экскурсия ҡарарға мөмкин. Балалар ҙа байрамдан ситтә ҡалмай, уларға Әмир Абдразаҡов исемендәге «Башҡортостан» киностудияһы фондынан йәнһүрәттәр һәм нәфис фильмдар күрһәтеләсәк.

“Башҡортостан Республикаһының Милли музейында 8 июлдә «Ныҡлы ғаилә – ил терәге!» Республика музей акцияһында көтөп ҡалабыҙ!” – ти музей хеҙмәткәрҙәре. Байрам саралары сәғәт көндөҙгө 4-кә тиклем дауам итәсәк.

Cығанаҡ: museumrb.ru/news/