“Рәсәйҙең мөғжизәле биҙәктәре”

Башҡортостан Республикаһының Милли музейында Рәсәй халыҡтарының мәҙәни мираҫы йылына һәм Берҙәм фольклор көнөнә арнап, “Рәсәйҙең мөғжизәле биҙәктәре” тип аталған күргәҙмә асылды. Унда Милли музей фондтарында һаҡланған башҡорт һәм Ырымбур аграр университетының тарих-этнография музейы фондтарынан килтерелгән Рәсәй халыҡтары таҫтамалдарын күрергә мөмкин.

Экспозиция материалдары таҫта­мал­дарҙы йола атрибуты булараҡ ҡул­ланыу тура­һын­да һөйләй. Бында милли биҙәктәр һа­лын­ған әй­бер­ҙәрҙең боронғо өлгөләрен – туҡылған һәм сигелгәндәрен – ҡарарға була.

Ябай ғына тойолған көнкүреш әйбере – таҫтамал таҙалыҡты һаҡлау өсөн генә тотонолмаған, ә халыҡ тормошонда үҙенә күрә айырым урын биләгән, ҡайһы бер йолаларҙы ат­ҡарғанда мөһим атрибут булып торған.

Милли музейҙа аңлатып китеүҙә­ренсә, Ырымбур аграр универси­тетының тарих-этнография музейы фондтарындағы таҫтамалдар коллек­ция­һы өлкәнең күп кенә ауыл-ҡа­лаларынан йыйылған. Улар өләсәй­ҙәрҙән тороп ҡалған һандыҡтарҙан да, халыҡ оҫталарынан да табылған. Бер өлөшө Воронеж, Рязань, Владимир, Смоленск өлкәләренән, Краснодар крайынан һәм Белоруссиянан килтерелгән.

Экспозиция этнография менән ҡыҙыҡһыныусыларға ла, биҙәү-ҡулланма сәнғәте оҫталарына ла, ғалим-тикшеренеүселәргә лә ҡыҙыҡлы булыр. Күргәҙмә 14 авгусҡа ҡәҙәр дауам итә. Билеттарҙы “Пушкин картаһы” буйынса ла алырға мөмкин.

Рәүилә ҒАТАУЛЛИНА