Башҡортостан – батырҙар, таланттар төйәге

Республикабыҙҙың Ә.-З. Вә­лиди исе­мен­дәге Мил­­­ли ки­тап­ха­наһында “Тере китап: Баш­ҡортостан – батырҙар төйәге” проектының исем туйы үтте.

Башҡортостан китапханалары ассоциацияһы ҡаһар­ман­лыҡ­тары хәҙерге быуын өсөн дә өлгө булып хеҙмәт итерҙәй батырҙарыбыҙ тураһында өс комикстар тупланмаһы тәҡдим итте. Уларҙа башҡорт халҡының милли батыры Салауат Юлаев, генерал Миңлеғәли Шайморатов, партизан отрядтары командир­ҙары Даян Мурзин һәм Вафа Әхмәҙуллин тураһында бәйән ителә. Китаптарҙың үҙенсәлеге бар: уларҙың артҡы тышлығы юҡ. Бер яғынан башҡорт телендәге яҙыуҙар менән оҙатылған һүрәттәр булһа, икенсе яғынан – рус телендә. Проект республика Башлығының граждандар йәмғиәте институттарын үҫтереү һәм социаль әһәмиәтле проекттарҙы тормошҡа ашырыу буйынса грант конкурсы еңеүсе­һе булып, уның ярҙамында тормошҡа ашырылған.

Комикстың төп образдарын талантлы рәссам-карикатурасы Камил Буҙыҡаев һәм “Муха” студияһы (етәксеһе – Артур Абдрах­манов) рәссамдары төшөр­гән. Сценарийҙы тарих фәндәре кандидаты Рәмил Рәхимов яҙған, башҡортсаға Зөһрә Бураҡаева тәржемәләгән. Комикстарҙағы батырҙар образы иһә “Башҡорт батырҙары” республика конкурсының финалына сыҡҡан балаларҙың эштәренә нигеҙләнеп башҡарылған.

Атап кителгән ижади конкурс­ты быйыл яҙ республиканың Граждандар йәмғиәтенә булыш­лыҡ ҡылыу фонды ярҙа­мында Милли китапхана һәм Баш­ҡор­тостан китапханалары ассо­циа­цияһы ойошторғайны. Уның маҡ­саты булып һәләтле бала­лар­­ҙы асыҡлау һәм уларға ярҙам итеү, илһөйәрлек, тыуған респуб­ли­каң, уның батырҙары менән  ғорурланыу тойғоһо тәрбиәләү торҙо. Конкурсҡа 218 эш килгән. Иң күп һүрәттәр Салауат образына бағышланған – батырҙы 147 бала төшөргән. Еңеүселәр “Салауат Юлаев – беҙҙең герой”, “Генерал Шайморатов”, “Партизан отрядтары командирҙары Да­ян Мурзин һәм Вафа Әхмәҙул­лин” номинацияларында билдә­ләнгән. Презентация барышында уларҙы бүләкләү сараһы ла үтте. Төп еңеүселәрҙән тыш, ҡай­һы бер балаларға махсус дип­ломдар ҙа тапшырылды. Еңеү­селәр комикстарҙың автографлы нөс­хәләренә лә эйә булды.

Махсус дипломға лайыҡ булғандарҙың береһе – Мәсетле районынан Айгөл Әбделмәнова. Ул 4-се класты тамамлаған. Өләсәһе Зөһрә Биктимер ҡыҙы әйтеүенсә, ейәнсәре бәләкәйҙән һүрәт төшөрөргә ярата. Бүл­мә­һен­дәге диуар тотош үҙенең эш­тәре менән биҙәлгән. Быға ҡәҙәр урындағы, районда үткәрелгән конкурстарҙа ла еңеү яулағаны булған. Конкурсҡа Айгөл Салауат батырға арналған һүрәт ебәргән.

– Һүрәт төшөрөү – яратҡан шөғөлөм, – ти ҡыҙ. –  Герой­ҙа­ры­­быҙға арналған һүрәттәр конкурсында ҡатна­шырға класс етәксебеҙ Фәнисә Данис ҡыҙы Абдрахманова тәҡ­дим итте. Республика кимә­лендәге сарала ҡатнашып, кө­сөм­дө һынай алған­ға шатмын. Хәҙер үҙемә ҡарата ышанысым арта төштө, – тип тыйнаҡ ҡына итеп ҡыуанысы менән бүлеште.

Ғафури районы ҡыҙы Ильгина Заһиҙуллинаға – 13 йәш. Ул – Крас­ноусольскиҙағы башҡорт гимназия-интернаты уҡыусыһы. Һүрәт төшөрөү менән ул да бәләкәй сағынан мауыға. Художество мәктәбендә лә шөғөл­ләнә. Конкурсҡа ебәрер өсөн  “Ҡара генерал” Даян Мурзинды төшөргән.

– Конкурсҡа эшемде ебәрһәм дә, ниндәйҙер уңышҡа өмөтлән­мәнем, сөнки республика кимә­лендәге сарала ҡатнашыусылар бик күп, араларында ныҡ оҫ­талары булыры билдәле. Махсус дипломға лайыҡ булыуым бер аҙ көтөлмәгән дә, шул ваҡытта ҡыуаныслы ла хәл, – тине ул. Ильгинаны бүләкләү сараһына ағаһы Артур алып килгәйне. Ул һеңлеһенең уңышы менән сикһеҙ ғорурлана, “туғаным бик талантлы, портретты айырыуса матур төшөрә. Уны алда ла уңыш көтөрөнә ышанам”, – ти.

Залда конкурсҡа ебәрелгән эш­тәрҙән күргәҙмә лә ҡуйыл­ғайны. Уларҙы ҡарап йөрөгәндә, ҡыуаныслы бер хис биләй: Башҡортостан – батырҙар, шуға өҫтәп, талантлылар ҙа төйәге ул!

Әлиә Фәтхетдинова,

“Тере китап: Башҡортостан – батыр­ҙар төйәге” проекты етәксеһе – Милли китапхана директоры урынбаҫары, Башҡортостан китапханалары ассоциа­ция­һы етәксеһе:

– Башҡортостандың бөйөк батырҙары тураһында мәғлүмәтте нисек ҡыҙыҡлыраҡ итеп балаларға еткерергә була, тигән һорау торғанда, шундай фекергә килдек: әлбиттә, сағыу һүрәтле, ҡыҙыҡлы китаптар аша! Шулай итеп комикстар баҫмаһы тыуҙы. Был уникаль китаптарҙа ҡаһармандарыбыҙҙың данлы тормош юлы диалогтар рәүешендә бирелә. Ҡыҫҡа ғына һүрәтләүҙәр аша балаларға геройҙар хаҡында бай мәғлүмәт еткерелә. Комикстарҙы респуб­ликабыҙҙың һәр китапханаһына бүләк иттек, улар менән һәр теләгән бала таныша аласаҡ.

Рәүилә ҒАТАУЛЛИНА