Бейеү үҙ-үҙеңә ышаныс уята

“Бухгалтерҙар колхозды ашай, бай була”, – тип әсәһе Гөлшатты уҡырға ебәрә. Күңеле тартмаһа ла, уҡып бөтөп, ауылына ҡайтҡас, ҡыҙға был һөнәр буйынса эш булмай. “Әлегә ошонда йөрөп тор инде”, – тип йәш белгесте клубҡа урынлаштыралар. Гөлшат Хәйбуллина бөгөнгәсә ҡыуана ул саҡта бухгалтер урынының буш булмағанына. Мәҙәниәт усағында уға шундай оҡшай!

Бейеүгә мөкиббән киткән Гөлшат йәш быуынға ла шул “ауы­рыуҙы” йоҡторор өсөн 42 йәшендә Стәрлетамаҡ мәҙәниәт техникумында ситтән тороп уҡып ҡайта. Яҡшембәттә Ермолаевка сәнғәт мәк­тәбенең филиалы асылғас, шунда күсә. Клубта халыҡ театрын етәкләүен дауам итә. Яҡшембәт мәҙәниәт йортоноң “Көйөргәҙе” халыҡ театры коллективына Стәр­летамаҡ башҡорт дәүләт драма театры артисы Рәсил Сынбулатов та ярҙам итеп тора, яҡташтарына ихлас консультация бирә.

Уңған мәҙәниәт әһеле балалар менән төшкә тиклем сәнғәт мәк­тәбендә, кисен – клубта. Тегеүсе булғас, балаларға төрлө бейеүгә костюмдар тегеп бирә.

Гөлшат Хәйбуллинаның иң ҙур ғорурлығы – Рәсәй, Европа, Ҡытай һәм Америка тамашасыларын хайран ҡалдырған балет артисы Рөстәм Исхаҡов. Матурлыҡ донъя­һына тәүге аҙымдарын сәнғәт мәктәбендә яһаған баланың һәлә­тен тойоп, уҡытыусы кәңәше­нә ҡолаҡ һалып, ата-әсәһе Рөстәмде Рудольф Нуриев исемендәге хореография колледжына уҡырға бирә. “Бигерәк шуҡ ине ул. Класҡа инһәм – юҡ. Тәҙрә ҡорғанына урала ла тора. Шул арала бейеүсе ҡыҙҙарҙың сәсенән тартып өлгөрә. Ниндәй хәрәкәт өйрәндек, ҡабат­ла, тиһәм, ҡорғанынан сиселеп килеп сыға ла тиҙ генә күрһәтеп бирә. Отҡор, сос инде. Тәбиғәттән бирелгән һәләт уны бейек үрҙәргә алып менде”, – ти Гөлшат.

Башҡорт опера һәм балет театры солисы, Башҡортостандың халыҡ артисы Рөстәм Исхаҡовты “башҡорт сәхнәһенең Спартагы” тип тә йөрөтәләр. 20 генә йәшендә башҡорт егете Юрий Григорович­тың данлыҡлы балетында төп ролде башҡара. “Корсар”ҙа Конрад, “Йоҡоға талған һылыу”ҙа – Дезире, “Аҡҡош күле”ндә – Зигфрид, “Щелкунчик”та – Принц, “Сың­рау торна”ла Йомағол ролдәрен һынландыра. “Жизель”, “Мөхәб­бәт тураһында легенда” һ.б. ба­леттарҙа төп партияларҙы уйнай.

БР-ҙың атҡаҙанған мәҙәниәт хеҙмәткәре Гөлшат Хәйбуллина йәш таланттарҙан “Йондоҙсоҡтар” өлгөлө балалар бейеү ансамбле төҙөгән. Балаларҙы бейеүгә йәлеп иткәндә Рөстәмде өлгө итеп ҡу­йып: “Бына һеҙ ҙә, тырышһағыҙ, ағайығыҙ кеүек сит илдәрҙе күрә­сәк­һегеҙ, уның кеүек “текә” машинала ауылға ҡайтып йөрөйәсәк­һегеҙ. Рөстәмгә йәш кенә көйө фатир бирҙеләр”, – тип ҡыҙыҡһын­дыра. Ысынлап та, сәнғәт мәктәбе­нән һуң вузға ингән егеттәр-ҡыҙҙар унда ла бейеүҙе ташламай. Остазына улар: “Һеҙҙең арҡала бейер­гә өйрәндек. Бейеү арҡаһында донъя күрәбеҙ, юғары стипендия алабыҙ”, – ти.

Станок янында сәғәттәр буйы төрлө хәрәкәттәр эшләү ҡыҙҙарға ныҡ оҡшай. Малайҙар ялҡып китә. Уларҙың урамда йүгереп йөрөгөһө килә. Аяғым ауырта, тип уҡырға килмәй ҡалғандар ҙа булғылай икән. “Сәхнә эше эш түгел”, – тип әйткән ата-әсәләргә Гөлшат: “Бейеүсе бер ваҡытта ла ас булмай. Киләсәктә тамадаға эйәреп булһа ла аҡса эшләй ала. Ҙур сәх­нәгә сыға алмағандарҙың да кәүҙәһе төҙәйә, атлауы матурая. Бейеү – ул гимнастика, спорт кеүек йыйнаҡлыҡҡа, эшһөйәрлеккә өй­рәтә, ихтыяр көсө тыуҙыра, үҙ-үҙе­ңә ышаныс уята. Балалары­ғыҙ­­ҙы артыҡ ҡурсаламағыҙ. Ыңға­йына тормағыҙ. Бөтә шарттар бар, файҙаланһындар, бейеһен­дәр”, – ти.

Уҡытыусы өсөн иң ҙур маҡсат – һәләттәр асыҡланһын, балалар интернетта әҙерәк ултырһын, урамда эт һуғарып йөрөмәһен, яман ғәҙәттәрҙән ситләшһен. Имен булмаған ғаиләләрҙән килгән балалар сәнғәт мәктәбендә йыуаныс, ҡыуаныс таба, үҙҙәренә иғтибар тойоп, ҡанатланып китә.  Хореограф, “Йондоҙсоҡтар” балалар бейеү ансамбле менән әүҙем шөғөлләнеүҙән тыш, сәләмәт тормошто пропагандалауға ла күп көс һала. “Бейеү яратыусылар” клубына өлкән апайҙар, ағинәйҙәр йөрөй.

Гөлшат Хәйбуллина кеүек үҙ эшен, балаларҙы яратҡан шәп белгес барҙа донъя кимәлендә Рөстәм Исхаҡов кеүек сағыу балҡыған йондоҙҙар тағы ла үҫеп сығыр, тип ышанабыҙ.

-  Тәнзилә ДӘҮЛӘТБИРҘИНА
  Көйөргәҙе районы