Көҙөн күп мәҙәни саралар көтөлә

Был турала матбуғат конференцияһында Башҡортостандың мәҙәниәт министры Әминә Шафиҡова хәбәр итте.

Республиканың Милли симфоник оркестры сентябрь баштарында Мәскәүҙә концерт ҡуя. Музыканттар Мәскәү дәүләт консерваторияһының Ҙур залында Илдар Абдразаҡовтың V юбилей фестивален асыу тантанаһында һәм икенсе көнөнә Мәскәү дәүләт академия филармонияһының П. Чайковский исемендәге концерт залы сәхнәһендә донъяға билдәле пианист Денис Мацуев менән бергә сығыш яһай.

Ә 30 августа республиканың дәүләт оркестры тыңлаусыларын Өфө сәнғәт училищеһының Концерт залында йыя. Симфоник көйҙәрҙе үҙ итеүселәргә был, һис шикһеҙ, матур бүләк булыр.

Иң көтөлгән ваҡиғаларҙың береһе – ул, әлбиттә, республика театрҙарында яңы миҙгелде асыу. Әле актерҙар йәйге ялдан сығып, яңы спектаклдәр өҫтөндә эш башлаған да инде.

Сентябрҙең икенсе йомаһында, 9-ы көнөндә, сираттағы Милли кейем көнө уҙғарыла. Ә 1 октябрҙә билдәле яҙыусы Сергей Аксаковҡа арналған Аксаков байрамы гөрләйәсәк.

11 октябрь – Башҡортостан Республикаһы көнө. Уға арналған байрамдар теҙмәһендә “Геройҙар дәүере” тип аталған Беренсе Бөтә Рәсәй патриотик йырҙар фестиваленең гала-концерты ла бар. Унда Рәсәйҙең халыҡ артисы Олег Газманов ҡатнаша. Легендар комдив, Рәсәй Геройы М. Шайморатовҡа һәйкәл асыу тантанаһы ошо көнгә билдәләнгән. Гала-концертты ла яңыртылған Совет майҙанында ҡарарға мөмкин була. Был көндө республика сәнғәт оҫталарының “Үлемһеҙ батырлыҡ өсөн тыуғандар” тип аталған концерты күҙаллана.