Йәштәр театры ижад миҙгелен аса

2 сентябрҙә уҙған миҙгелдең иң уңышлы премьераларының береһе – Г. Служителдең “Дни Савелия” квест-спектакле, 3 сентябрҙә Н. Саймондың "Яҙмышымдың икенсе бүлеге" трагикомедияһы менән Мостай Кәрим исемендәге Милли йәштәр театры үҙенең 33-сө ижад миҙгелен аса.

"Алдағы миҙгел дә ҡыҙыҡлы, мауыҡтырғыс булмаҡсы. Әлеге мәлдә театр актерҙары бер юлы бер нисә премьера өҫтөндә эш алып бара. Һәр яңы премьера тураһыңда хәбәр итеп барырбыҙ.

Миҙгел асылыу менән, театр коллективы Владикавказда үтәсәк Рәсәй милли театрҙарының дүртенсе “Театр көҙө” фестивалендә – А.С. Пушкиндың “Капитан ҡыҙы” спектакле, ә сентябрь аҙағында Саранск ҡалаһында “Худсовет” төбәк-ара йәш театрҙар фестивалендә Г. Белых һәм Л. Пантелеевтың “Республика ШКИД” спектакле менән ҡатнаша. Яңы көс, яңы һулыш менән эш башлаған актерҙар фестивалдәрҙән еңеүҙәр менән ҡайтыр тип көтәбеҙ", – тип хәбәр итте театрҙың әҙәбиәт бүлеге етәксеһе Рәзилә Ырыҫҡужина.

Һүрәттә: "Яҙмышымдың икенсе бүлеге" спектакленән бер күренеш. Театр архивынан.