Йомабай Иҫәнбаев исемендәге конкурс нисек бара?

Бөгөн Хәйбулла районында Йомабай Иҫәнбаев исемендәге республика ҡурайсылар конкурсы асылды.

Ул ҡурай уйнау традицияларын һаҡлауға, тергеҙеүгә, артабан үҫтереүгә, һәләтле башҡарыусыларҙы асыҡлауға, йәштәрҙе башҡорт инструменталь фольклорына йәлеп итеүгә, был сәнғәт төрөн пропагандалауға йүнәлтелгән.

"Йомабай Иҫәнбаев - ҡурайҙа көйҙәрҙе профессиональ башҡарыу сәнғәтенә нигеҙ һалыусыларҙың береһе. Сит ил сәхнәһендә милли сәнғәтебеҙҙе күрһәткән тәүге башҡорт музыканттарының береһе ул, - тип билдәләне Республика халыҡ ижады үҙәге генераль директоры урынбаҫары Нәфисә Тулыбаева.

Сарала Хәйбулла районы Советы рәйесе Тимур Рәмов, Рәсәйҙең һәм Башҡортостандың атҡаҙанған мәҙәниәт хеҙмәткәре, Башҡортостандың халыҡ артисы, Салауат Юлаев исемендәге дәүләт премияһы лауреаты Юлай Ғәйнетдинов ҡатнаша.

Быйыл конкурс 1812 йылғы Ватан һуғышында еңеүҙең 210 йыллығына арнала. Тантананы асҡас, Туймазы, Ауырғазы, Күгәрсен, Йылайыр, Учалы, Хәйбулла, Белорет, Әбйәлил, Баймаҡ райондарынан, Күмертау, Сибай, Өфө ҡалаларынан килгән ансамблдәр тарафынан ошо датаға арналған көйҙәр яңғыраны. "Ҡаһым түрә" йырын билдәле сәхнә оҫтаһы Ғәзим Ильясов башҡарҙы.

Конкурста Башҡортостандан, Мари Иленән, Красноярск крайынан 300-ҙән ашыу кеше һынау тота. Сара барышында элекке лауреаттар, халыҡ йырсылары, бейеүселәр һәм быйылғы еңеүселәр ҡатнашлығында концерттар, ҡурайсылар ансамблдәре етәкселәре өсөн "түңәрәк өҫтәл"дәр үтәсәк. Иртәгә, 17 сентябрҙә, Үҙәк мәҙәниәт һәм ял паркында Йомабай Иҫәнбаев исемендәге Республика ҡурайсылар конкурсын ябыу тантанаһы һәм Гала-концерт була. Сара көндөҙгө сәғәт 3-тә башлана. Конкурсты ойоштороусылар - Башҡортостан Мәҙәниәт министрлығы, Республика халыҡ ижады үҙәге, Хәйбулла районы хакимиәте, Башҡортостандың Ҡурайсылар союзы.

Конкурс еңеүсеһенә Хәйбулла районы хакимиәте әҙерләгән ат бүләк ителәсәк.

Фото: Башҡортостан Мәҙәниәт министрлығы сайты.