Бөгөн Хөрмәтулла Үтәшев ҡотлауҙар ҡабул итә

Бөгөн билдәле актёр, режиссёр һәм театр эшмәкәре, Бөтә донъя башҡорттары ҡоролтайының Президиумы ағзаһы, Рәсәйҙең, Башҡортостандың халыҡ артисы, Салауат Юлаев исемендәге дәүләт премияһы лауреаты Хөрмәтулла Ғаззали улы Үтәшевтың тыуған көнө.

Яратҡан артисыбыҙҙа ҡасан сәхнәгә һөйөү уянған?

– Фәриғә апайым мәктәптә уҡыған осоронда уҡ шиғырҙар яҙҙы. Әле лә хәтеремдә, уның ҡыҙыл бәрхәт менән көпләнгән фотоальбомы бар ине. Һәр биттә фотолағы рәсемгә бәйле шиғри юлдар... Ә минең башыма һыймай... Нисек инде, ябай ғына һүҙҙәрҙән шундай матур шиғырҙар яҙып була икән...
Мәктәпте тамамлағас, апайым клуб мөдире булып эшләй башланы. Кисәләргә үҙе сценарийҙар яҙа, үҙе алып бара, йырлай, бейей, шулай уҡ спектаклдәр ҡуя. Мине лә, үҫмер егетте, был үҙешмәкәр түңәрәккә ылыҡтырҙылар. Мин дә апайым кеүек клубтан сыҡмай, ижад ҡомары менән яна башланым...
Сәнғәткә булған һөйөү, һүҙ ҡәҙере миңә нәҡ Фәриғә апайым өлгөһөндә һеңде һәм ваҡыт үтеү менән төп һөнәремә әйләнде. Шуға күрә Фәриғә апайыма оло рәхмәт әйтеп, киләсәктә лә ижади уңыштар теләйем. Ҡәләмеңде һис тә ташлама, апаҡайым! – тип яҙған Хөрмәтулла Үтәшев социаль селтәрҙәге сәхифәһендә.

Хөрмәтулла Ғаззали улы Үтәшев 1959 йылдың 23 ноябрендә Хәйбулла районының Солтанғужа (хәҙер Таштуғай) ауылында тыуған.

Ул “Атайсал” проектында ҡатнашып, Таштуғайҙа ҡоҙоҡто таҙартып, уны бурап, кәртәләп, матур итеп төҙөкләндереүгә аҡса бүлгән. Шулай итеп артист тыуған яғын да онотмай.

"Башҡортостан" гәзите коллективы ла халҡыбыҙҙың данлы улы Хөрмәтулла Үтәшевты тыуған көнө менән ҡотлап, һаулыҡ, оҙон ғүмер, ижади уңыштар теләй!

Фото һәм мәғлүмәт сығанағы: vk.com.