Әлшәйҙә сәсәндәр майҙанға сыҡты

Әлшәй районының Раевка ауылында “Урал батыр байрамы” ҡышҡы фольклор-спорт сараһы уҙҙы.

Байрамға йыйылыусыларҙы район хакимиәте башлығы урынбаҫары Айҙар Солтанғолов тәбрикләне. “Бер нисә йыл инде беҙҙең районда иң матур бай­рамдарҙың береһе – эпос һөйләү­селәрҙең төбәк-ара конкурсы үтә”, – тип билдәләне ул. Әммә бөгөнгө байрам алдағыларынан һиҙелерлек айырыла. Беренсенән, ҡатнашыусылар өсөн халыҡ уйындары һәм спорт ярыштары әҙер­ләнгән – милли көрәш, уҡ атыу, таяҡ һәм арҡан тартыш, суҡмар ырғытыу. Икенсенән, "Урал батыр" эпосын һөй­ләүселәрҙең сығыштары конкурсһыҙ ойошторола.

Проект авторы – яҡташыбыҙ, филология фәндәре докторы, сәсәниә Розалия Солтангәрәева, Дәүләт Йыйылышы – Ҡоролтай депутаты, Башҡорт ҡатын-ҡыҙҙары йәмғиәте рәйесе Гөлнур Ҡолһарина тамашасыларға тәбрикләү һүҙҙәре менән мөрәжәғәт итте. Шуныһын билдәләп китергә кәрәк: “Урал батыр байрамы” – Башҡорт ҡатын-ҡыҙҙары йәмғиәтенең төп проекттарының береһе.

Сарала Башҡорт ҡатын-ҡыҙҙары йәмғиәте рәйесе урынбаҫары Гөлфинә Юламанова, филология фәндәре докторы, Рәсәй Фәндәр академияһы Өфө федераль тикшеренеүҙәр үҙәгенең баш ғилми хеҙмәткәре Нәркәс Хөббөтдинова, сценарист, драматург, прозаик Шәүрә Шәкүрова, Республика халыҡ ижады үҙәгенең баш белгесе Гөлгөнә Баймыр­ҙина ҡатнашты.

Ап-аҡ ҡар менән ҡапланған Раевка ял паркындағы күңелле, дәртле ярыштар бер тынала үтеп китте. Ғәҙәттәгесә, сәсәндәр майҙанында йәштәрҙән алып ололарға ҡәҙәр һүҙ тотто. “Урал батыр” эпосынан өҙөктәрҙе был көндә Дәүләкән, Әлшәй оҫталары яңғыратты. Ҡатнашыу­сыларҙың барыһына ла иҫтәлекле бүләктәр тапшырылды.

Мәҙәни-спорт сараһы тыныслыҡ, татыулыҡ, мөхәббәт тураһында изге теләктәр теләү менән тамамланды, ҡатнашыусылар байрам һыйынан да ауыҙ итте. “Урал батыр байрамы” Башҡортостан Республикаһы Башлы­ғының мәҙәниәт һәм сәнғәт эшмәкәр­ҙәренә бирелгән гранты нигеҙендә ойошторолдо.

 
Фәнүзә СУФИЯНОВА

Әлшәй районы.