Был көй-моңдар һәр кемде әсир итер

Ошо көндәрҙә  танылған композитор Урал Иҙелбаев 50 йәшлек күркәм юбилейын билдәләй. Беҙ уны М. Ғафури исемендәге Башҡорт дәүләт академия драма театрының музыка бүлеге мөдире, Ш. Бабич исемендәге дәүләт йәштәр премияһы лауреаты, Башҡортостандың атҡаҙанған сәнғәт эшмәкәре булараҡ беләбеҙ. Урал Мирас улының таланты һәм бай ижаи эшмәкәрлеге “Башҡортостан Республикаһындағы фиҙакәр хеҙмәте өсөн” маҡтау билдәһе менән баһаланған.

Композиторҙың алтын юбилейы уңайынан республика театрҙарында Урал Иҙелбаев тарафынан музыкаль йәһәттән биҙәлгән  спектаклдәр, тамашалар бара.

Башҡорт дәүләт филармонияһы тәҡдим иткән “Алыҫ планеталарға бүләк” концерты Башҡорт теле көнөнә арнала. Уның төп геройҙары – Ҡурайсы ағай (Башҡортостандың атҡаҙанған артисы Азат Биксурин) һәм сит планетанан килеүсе Сулпан (Ҡурсаҡ театры актрисаһы Дилә Муллабаева). Концерттың төп йөмәткеһе башҡорт моңоноң, милли музыканың бөйөклөгөн танытыу. Ер кешеләрен генә түгел, сит планеталарҙағы йән эйәләрен әсир итерлек ошо көйҙәрҙе Урал Иҙелбаев ижад иткән!

Спектакль-концертта балаларҙың күп булыуы ҡыуандырҙы. Таңсулпан һам Зөһрә Бураҡаевалар яҙған сценарий бик мауыҡтырғыс итеп төҙөлгән. Тамаша барышында башҡорт телен белмәгән башҡа милләт балалары ла башҡорт теленең иң матур һүҙҙәре менән таныша, уның байлығын, аһәңлеген тоя ала.

Спектакль барышында яңғыраған көй-моңдар беҙҙе халҡыбыҙҙың үткәндәренә – бай тарихына алып китте, бөгөнгөһө менән таныштырҙы, киләсәккә өмөт-ышаныстары тураһында һөйләне. Башҡортостан Республикаһының Милли халыҡ инструменттары оркестры һәм Таһир Сәйфуллин исемендәге Башҡортостан Республикаһының дәүләт академик хор капеллаһы оҙатыуында улар тағы ла аһәңлерәк, тағы ла ҡеүәтлерәк яңғыраны. Концертта композиторҙың ижадтаж дуҫтары ла ҡатнашты. Улар Урал Иҙелбаев ижад иткән моңло йырҙарҙы башҡарҙы.

Ғөмүмән, алыҫ планеталарға ғына түгел, йөрәгендә халҡына һөйөү осҡоно йөрөткән һәр кемебеҙгә оло бүләк булырлыҡ тамаша әҙерләгән ижади төркөм. “Афарин!”дан башҡа һүҙ юҡ!

Автор фотолары.