Театрҙарыбыҙ өсөн һөйөнәбеҙ

Быйыл “Ҙур гастролдәр” федераль программаһында ҡатнашҡан театрҙарҙың исемлеге билдәле. Араларында Башҡортостандың дүрт учреждениеһы булыуы айырыуса һөйөнөслө. Улар – М. Ғафури исемендәге Башҡорт дәүләт академия драма, Рус дәүләт академия драма, Салауат башҡорт драма, Стәрлетамаҡ рус драма театрҙары. Был хаҡта республиканың Мәҙәниәт министрлығы хәбәр итә.

“Ҙур гастролдәр” программаһы 2014 йылда тормошҡа ашырыла башланы. Ул илдә берҙәм мәҙәни мөхит булдырыуға, театр коллективтарының үҙ-ара ижади хеҙмәттәшлегенә булышлыҡ итеүгә, берләштереүгә йүнәлтелгән. Тамашасылар Рәсәй һәм сит илдәге рус театрҙарының иң яҡшы спектаклдәрен ҡарау мөмкинлегенә эйә була. 

Программаның рәсми сайтында хәбәр ителеүенсә, проекттың географияһы – Калининградтан алып Камчаткаға, Дербенттан Чукоткаға ҡәҙәр. Сәхнә әҫәрҙәре төрлө йәштәге аудиторияға – өлкәндәргә, балаларға, ғаилә менән ҡарауға йүнәлтелгән.

“Ҙур гастролдәр” коллективтарға күрше төбәктәргә генә түгел, алыҫ яҡтарға ла сығырға, Мәскәү, Санкт-Петербург һәм башҡа бай мәҙәни тарихлы ҡалаларҙың ижады менән таныштырырға мөмкинлек бирә.

Фотолар театрҙарҙың сайттарынан алынды.