Рәми бер ҡасан да онотолмай!

Шағирҙың йорт-музейында иҫкә алыу саралары үтеп тора. Иҫтәлекле дата – шағирҙың тыуған көнө айырым мәғәнәгә эйә. Быйыл да музей хеҙмәткәрҙәре был көнгә алдан уҡ әҙерләнеп, төрлө саралар ойошторған.

Йорт-музейҙа шағирҙың әҫәрҙәрен, көндәлектәренән өҙөктәр уҡыуға бағышланған "Ҡауырһыным" шиғриәт сәғәте, китаптарынан күргәҙмә, "Шағир портреты" тигән балалар һүрәттәре күргәҙмәһе ойошторолған. Арҡауыл мәктәбе уҡыусылары һәм мәҙәниәт хеҙмәткәрҙәре ҡатнашлығында "Рәми – беҙҙең йөрәктәрҙә" тип аталған кисә үткән.

Бөгөн иһә бөйөк ижадсыны хәтергә алырға әҙәбиәт һөйөүселәр йыйылған. Рәми рухын һаҡлаған атайсалы өсөн 12 февраль көнө айырыуса ҡәҙерле. Йорт-музей етәксеһе Луиза Хәйретдиноваға бәйләнешкә сыҡтыҡ.

– Мәшһүр яҡташыбыҙҙың ижадын үҙ иткәндәр митингҡа йыйылдыҡ. Р. Ғариповтың шиғырҙарын һөйләнек, үлемһеҙ "Туған тел" шиғырын күмәкләп уҡыныҡ. Шағир һәйкәленә сәскә һалдыҡ. Йорт-музейҙа ла Рәми шиғырҙары яңғыраны, уның һүҙҙәренә яҙылған йырҙар башҡарылды. Беҙҙең күңелдәргә айырым бер йылылыҡ һирпелгән кеүек, Шағир рухы ла шат булғандыр, тип ышанғы килә, – тине Луиза Хәбир ҡыҙы.

Шулай була күрһен!

Фотолар - Рәми Ғариповтың йорт-музейы төркөмөнән.