“Байғужа феврале” геройҙар төйәгенә саҡырҙы

Ватанды һаҡлаусылар көнө алдынан Яңауыл районының Байғужа ауылы мәҙәниәт йортонда “Байғужа феврале” тип аталған патриотик йырҙар башҡарыу буйынса район конкурсы үтте. 

Байғужа – ике геройҙың – Советтар Союзы Геройы Ғәйнанша Хәйҙәршин менән Социалистик Хеҙмәт Геройы Сабит Йәғәфәровтың тыуған төйәге.  

– Данлы яҡташтарыбыҙҙың исемен мәңгеләштереү маҡсатында киләсәктә бындай сараны йыл һайын үткәрергә ҡарар иттек, - ти Байғужа ауыл биләмәһе башлығы Зөфәр Йәсәүи улы Вәлиев.

Конкурста тотош райондан 38 конкурсант ҡатнашҡан. Иң йәш йырсыға – 14, иң олоһона – 75 йәш. Рус, башҡорт, татар, мари, удмурт телдәрендә һуғыш йылдарында ижад ителгән, тыуған төйәккә һөйөү хаҡында йырҙар яңғыраған.

Ҡатнашыусыларҙы Рәсәйҙең атҡаҙанған, Башҡортостандың халыҡ артисы Фәнәүи Сәлихов етәкселегендәге жюри баһалаған. Еңеүселәргә аҡсалата бүләктәр, дипломдар тапшырылған. Гран-приға Ямаҙы ауылынан Люциә Әхәтова лайыҡ булған. Иҫке Ҡоҙаш ауылынан Айһылыу Дусҡаева – беренсе, Киҫәкҡайын ауылынан Гөлнара Яхина – икенсе, Байғужа ауылынан Әлмира Фәттәхова өсөнсө урынды алған.

Сараның бағыусылары булып Илгиз Муллаҡаев, Айрат Ғәлиханов, Айнур Әмиров сығыш яһаған.

Гала-концертта ҡатнашыусыларҙы һәм еңеүселәрҙе Яңауыл районы хакимиәте башлығы Илшат Әғзәм улы Вәзиғәтов ихлас сәләмләп, был изге эштең дауамлы булыуын теләгән. Тыуған илгә һөйөү тәрбиәләүҙе, илһөйәрлек рухындағы йырҙарҙы популярлаштырыуҙы маҡсат итеп ҡуйған “Байғужа феврале” конкурсының даны киләсәктә тағы ла нығыраҡ таралыр, халыҡ таланттарын йәлеп итеп, яңынан-яңы исемдәр асыр, тип ышанайыҡ.

Фотолар: Байғужа ауыл биләмәһенән.