Тормошо йәштәргә өлгө булырлыҡ

Федоровка районының ағинәйҙәр ойошмаһы етәксеһе Минисара Иҫәнғолова үҙенең хеҙмәт юлын полиграфияға бағышлаған.

37 йыл хеҙмәт стажы булһа, шуның 10 йылын - типографияла хәреф ҡойоусы, 27 йыл Фёдоровка районы типографияһының директоры булып эшләгән. Бынан 12 йыл элек хаҡлы ялға сыҡҡан. 20 йыл район мәҙәниәт хеҙмәткәрҙәренең профсоюз ойошмаһын етәкләй, 18 йыл район һайлау комиссияһы ағзаһы, секретары була.

- Республикала “Ағинәйҙәр” ҡоро эшләй башлау менән,  2016 йылда тынғыһыҙ  уҡытыусы-пенсионер Рәйфә Вәлиева  башланғысты хуплап районда ошо эште башлап ебәрҙе. Ул ғаиләһе менән Өфө районына күсеп киткәс, 2017 йылдан “Ағинәйҙәр” ойошмаһын мин алып барам. Урындағы үҙидара органдары менән берлектә кәңәшләшеп эшләйбеҙ. Ауыл биләмәһе башлыҡтары беҙҙең һәр эшебеҙҙе хуплап, ярҙам итеп тора. Һәр ауылда ағинәйҙәр күрешеп, йыйылышып ижад итер өсөн уңайлыҡтар булдырылған, эш бүлмәләре бирелгән, - тип һөйләне ул.

Райондағы  башҡорт ауылдарының бөтәһендә лә “Ағинәйҙәр” ойошмаһы эшләп килә икән. Ойошма ағзалары итеп уңған, әүҙем, мәртәбәле ҡатын-ҡыҙҙар һайланған. Уларҙың һәр ҡайһыһының хеҙмәт юлы ла, тормошо ла йәштәргә өлгө булырлыҡ. Йәмғиәтебеҙҙе, йәш быуынды тәрбиәләүҙә Федоровка ағинәйҙәре  матур үрнәк була белә.

Фото: шәхси архивтан.