Һин ултыртҡан муйыл...

Тиҙҙән хуш еҫтәр таратып, тирә-яҡты аҡлыҡҡа күмеп, муйыл сәскә атыр. Ошо сихри миҙгелдә Роза Аҡкучукова башҡарыуында яңғыраған “Һин ултыртҡан муйыл” йырын тыңлаған һайын: “Эх, Роза апай, һин ултыртҡан муйыл сәскә атты быйыл. Тик һеҙ генә инде ике йыл был хозур­лыҡҡа ҡыуана алмайһығыҙ...” – тигән уйҙар тыуа.

Эйе, үҙе китте, әммә уның башҡарыуындағы йырҙар өлкән быуындың да, йәштәрҙең дә кү­ңелендә йәшәй. Быға Роза Аҡ­кучукова призына ойошторолған район һәүәҫкәр йырсылар конкурсында булып, тағы ла инандыҡ.

Сара артистың тыуған ауылы Абҙаҡта үтте. Тәүҙә Роза Аҡкучуко­ваның туғандары, Өфөлә йәшәгән яҡташтары, уның мәңгелек йортона – ҡәберенә сәскә һалып, фатиха алды. Һуңынан барыһы ла Абҙаҡ ауыл мәҙәниәт йортона юлланды.

Әйтергә кәрәк, Роза Аҡкучукова­ның ижадын һаҡлап ҡалыу, таратыу һәм яңы һулыш биреү маҡса­тында уҙғарылған сараның баш­лан­ғысында уның Өфөлә йәшәгән яҡташтары тора. Улар ошо тәҡдим менән район хакимиәте етәкселе­генә мөрәжәғәт итте. Конкурсты ойоштороуҙы Роза Сабир­йән ҡыҙының туғандары ла күтәреп ала һәм бар яҡлап ярҙам итә.

Рәсәйҙең атҡаҙанған артисы, Башҡортостандың халыҡ артисы Рәмил Ғәйзуллин, Башҡортостан­дың халыҡ артисы, Салауат Юлаев исемендәге дәүләт премияһы лауреаты Риф Ғәбитов, Башҡортос­тандың атҡаҙанған матбуғат һәм киң мәғлүмәт хеҙмәткәре, йырсы­ның килене Рәзилә Салауатова һәм Белорет ҡала мәҙәниәт һара­йының “Алтынай” халыҡ һәм “Ләй­сән” балалар вокаль ан­самблдәре етәксеһе Луиза Мөхөт­динова йыр бәйгеһендә ҡатна­шыусыларҙың оҫталығын баһа­ланы.

Конкурс шарттарына ярашлы, сығыш яһаусылар Роза Аҡкучукова репертуарынан һәм халыҡ йырҙа­рын башҡарҙы. Сарала 30-ҙан ашыу кеше ҡатнашты. Ижади бәйгелә йырсының репертуарынан “Алтын балдаҡ” йырын йыш башҡарҙылар, шулай уҡ “Әбйәлил сеңләүе” лә, башҡорт халыҡ йырҙары ла яңғыраны.

Еңеүселәр дүрт йәш катего­рия­һы буйынса баһаланды: 7 – 11, 12 – 16, 17 – 23 йәшлектәр һәм 24 йәштән өлкәндәр. Конкурсанттар араһынан Рысыҡайҙан Ралина Ғәлиастанова, Белорет лицей-интернатынан Гөлшат Абдуллина, Асынан Фәриҙә Ноғаманова һәм Юлиә Ниғәмәтова, Йөйәктән Айзи­лә Закирова, Белореттан Элина Сафуанова, Үткәлдән Таңһылыу Вәхитова, Ҡоҙғон-Әхмәрҙән Зәлифә Фазлетдинова һәм Наил Хәмзин, Татлынан Мәфрүзә Оморҙаҡова, Үҙәнбаштан Зифа Ситдиҡова, Сермәндән Сафура Абдрахманова, Абҙаҡтан Вәсилә Хазиева призлы урындарға лайыҡ булды. Гран-при Үткәл ауылынан һәүәҫкәр йырсы Зилә Шәғәлинаға тапшырылды. Шу­лай уҡ ул Аҡкучуковтар ғаиләһе­нең махсус бүләгенә лайыҡ булды.

 Конкурста ҡатнашҡан һәр кеше мәҙәниәт идаралығы, Абҙаҡ мәҙә­ниәт йорто исеменән Маҡтау ҡағыҙ­ҙары, еңеүселәр иһә аҡсалата бүләктәр менән билдәләнде.

Сараның икенсе өлөшөндә гала-концерт булды. Унда район хаки­миә­тенең мәҙәниәт идаралығы начальнигы Ольга Овчинникова, Абҙаҡ ауыл хакимиәте башлығы Хәмзә Мөхәмәҙиев, Башҡортостан Яҙыусылар союзы рәйесе Айгиз Баймөхәмәтов, жюри ағзалары, йырсының яҡындары исеменән улы Руслан Шәйхетдинов, бер туғандары Ишбулат менән Урал Аҡкучуковтар һәм башҡалар иҫтә­лектәрен уртаҡлашты, ауыл­даш­тарға, ойоштороусыларға рәх­мәт белдерҙе. Абҙаҡ мәҙәниәт йорто­ноң “Өлкәр”, Сосновка күп тармаҡ­лы ауыл клубының “Арташ” бейеү коллективтары, Өфө ҡунаҡ­тары – Башҡортостандың атҡаҙан­ған артисы Марсель Ҡотоев, “Башҡортос­тан” дәүләт концерт залы ҡурай­сыһы Илнур Һибәтул­лин сығышта­ры менән концертты биҙәне.

Ғөмүмән, Роза Аҡкучукова ижадын мәңгеләштереү маҡсатында ойошторолған  тәүге конкурс бик уңышлы үтте. Ауылдаштары уның киләсәктә лә дауам итеүен теләп таралышты.

Айгиз БАЙМӨХӘМӘТОВ, Башҡортостан Яҙыусылар союзы рәйесе:

– Роза Аҡкучукова – башҡорт йыр сәнғәтендә ҡабатланмаҫ эҙ ҡалдырған шәхес. Хәҙерге көндә бар йырсыларҙы ла “йондоҙ” тип әйтергә күнеккәнбеҙ, ә Роза апай киң мәғәнәһендә беҙҙең эстрада йондоҙо булды, сөнки уның ижады халыҡтың йөрәгенә, күңеленә һеңеп ҡалған, бер нисә быуын уның йырҙарын тыңлап үҫте, ижады күңелебеҙҙә йәшәй. Әлбиттә, тыуған яғында – Белорет районының Абҙаҡ ауылында уның иҫтәлегенә йыр конкурсы үткәрелеүе ихтирамға лайыҡ, сөнки ундай шәхестәрҙе ҙурларға бурыслыбыҙ. Киләсәктә конкурстың географияһы киңәйер, төбәк-ара, республика кимәлендә үтергә тейеш, тип уйлайым, сөнки Роза Аҡкучукованың ижады киң даирәгә танылған. Роза апай беҙҙең өсөн бик ҡәҙерле, яҡын кеше булды, сөнки ул ябай, шул уҡ ваҡытта мәшһүр ҙә, һәр кемгә кәңәшсе лә, оло йөрәкле ижадсы ла ине. Уның йырҙарын тыңлап, ул беҙҙең арала, тип күҙ алдына килтерәбеҙ.

Руслан ШӘЙХЕТДИНОВ, Роза Аҡкучукованың улы:

– Район күләмендәге беренсе тапҡыр уҙғарылған сара булһа ла, ул яҡшы һәм юғары кимәлдә үтте. Киләсәктә лә конкурс дауам итһен ине. Ошо сараны әҙерләгән Белорет районы хакимиәтенә, Абҙаҡ ауыл хакимиәтенә, мәҙәниәт йорто директорына, баһалама ағзаларына һәм конкурсанттарға, үҙемдең яҡын туғандарыма ҙур рәхмәт.  

Рәзилә САЛАУАТОВА, артистың килене:

–Тамашасының Башҡортостандың халыҡ артисы Роза Аҡкучукованы хөрмәт итеүе уның йырҙарын яратып башҡарыуында һиҙелә. Ижади бәйгеләрҙең зәңгәр экрандар, радио аша һирәк яңғыраған йырҙарын да яҡшы белеүенә инандыҡ. Һәүәҫкәр йырсыларҙың күңел биреп башҡарыуы, ҡайһы берҙәрендә ҡәйнәм йырлаған кеүек ноталар ҙа сағыла, шул уҡ ваҡытта күҙгә йәш төйөлә. Йылы, матур, туғандарса сара булды ул. Конкурста гран-при яулаған Зилә Шәғәлина ла уның йырына өҫтөнлөк биргән. Уның башҡарыуында “Әбйәлил бәйете”ндә ҡәйнәм йырлаған кеүек үк әйләнештәр ишетелде, тембры ла оҡшап китте. Ғаиләбеҙ өс һәүәҫкәрҙе билдәләргә ҡарар ҡылды. Рысыҡайҙан бәләкәй Ралина Ғәлиастанова ла күңелгә ятты – “Һаумы, һаумы, яҙ!” тигән йырҙы шул тиклем матур итеп башҡарҙы. Абҙаҡтан Вәсилә Хазиева иһә дәртле сығышы өсөн ғаиләбеҙ тарафынан билдәләнде һәм махсус бүләк тапшырылды.

Ишбулат АҠКУЧУКОВ, артистың бер туған ағаһы:

– Әлбиттә, сараға әҙерлек барышында тулҡынландыҡ та. Шулай ҙа конкурста ҡатнашырға теләгәндәр күп булыр, тип ышандыҡ. Йыр бәйгеһе юғары кимәлдә үтһен өсөн бар көсөбөҙҙө һалдыҡ. Беҙҙең Розабыҙ ҙа ишетеп-күреп торалыр инде. Бөтә туғандарыбыҙға, ҡустыларға, килендәргә конкурс оҡшаны, ауылдаштар ҙа ҡәнәғәт.

Рифҡәт НӘЖМЕТДИНОВ, ауыл ветерандар советы рәйесе:

– Ҡурҡҡан эш хәйерле була, тиҙәр. Беҙ ауылда бындай конкурсты беренсе тапҡыр үткәргәс, әҙерәк шөрләңкерәй инек, әммә сара бик матур үтте.

Зилә ШӘҒӘЛИНА, гран-при яулаусы:

– Бәләкәйҙән йыр-моңға ғашиҡмын. Роза Аҡкучукованың “Алтын балдаҡ”, “Һин ултыртҡан муйыл” кеүек йырҙарын тыңлап үҫтек. Ошо конкурсты ойошторғандарын ишеткәс, ихлас күңелдән ҡатнашырға килдек. Әлбиттә, гран-при яулармын тип уйламағайным. Аллаға шөкөр, Ураҙа айында миңә шундай ҙур ҡыуаныс килде, бүләктәр ҙә һәйбәт булды. Ойоштороусыларға, Роза Аҡкучукованың туғандарына ҙур рәхмәт.

Иршат ШӘҒӘЛИН, Үткәл мәҙәниәт йорто хеҙмәткәре:

– Байрам бик матур үтте. Ойоштороусыларға ҙур рәхмәт. Беҙҙе юғары кимәлдә ҡаршы алдылар. Гран-при менән беренсе урынды беҙҙең Үткәл ауылының һәүәҫкәр йырсылары яуланы, шуға ла бик шатландыҡ.

- Рәмилә МУСИНА