Башҡортостанда фильмдар төшөрөүгә грант бирелә

Башҡортостан Республикаһының Гранттар фонды Радий Хәбировтың ҡарары буйынса, кинематография өлкәһендәге проект­тарҙы ҡеүәтләү маҡсатында, махсус конкурсҡа 50 миллион һум бүлде. Был аҡсаны нисек юллап алырға була?

Коммерция нигеҙендә дәүләт ойошмаһы булмаған, йәғни ойош­маның составында дәүләт орган­дарының учредителдәре булма­ған, иҡтисади эшмәкәрлеге ОКВЭД буйынса кинематогра­фияға бәйләнгән һәм бер йыл элек теркәлгән ойошмалар конкурсҡа ғариза яҙа ала.

Улар быйыл 1 августан 1 сен­тябргә тиклем ҡабул ителә. Ҡағиҙәгә ярашлы, документтарҙан башҡа, ғаризаға фильмдың пре­зентацияһын һәм сценарийын да индерергә кәрәк.

Грантглавы102.рф сайтында ғаризаны бирергә һәм конкурстың положениеһы менән ныҡлап танышырға була.

 “Башҡортостан” киностудияһы, БР Мәҙәниәт министрлығы һәм бәйге комиссияһы конкурстың положениеһын әҙерләү буйынса ҙур эш башҡарҙы.

“Конкурс бик үҙенсәлекле, до­кументтарҙы иғтибар менән өйрә­нергә саҡырам. Яҡын арала фонд даими ҡатнашыусылар менән бер нисә осрашыу ойошторасаҡ, унда бар шарттар ҙа ентекле аңла­тыласаҡ”, – тип белдерҙе Баш­ҡортостан Республикаһы Гранттар фондының генераль директоры Роман Низаметдинов.

Еңеүселәр өсөн гранттың иң ҙур күләме 15 миллион һум тәш­кил итә. Ғаризалар түбәндәге 10 йүнәлеш буйынса ҡабул ителә:

1. Тарихи һәм мәҙәни хәтер (күренекле шәхестәргә, Башҡорт­ос­тан һәм Рәсәй тарихындағы мөһим мәҙәни һәм тарихи ваҡиғаларға, төп дәүләт байрамдары һәм иҫтәлекле ваҡиғаларға арналған проекттар).
2. Балаларға – иң мөһим мәл тураһында (тәрбиәүи характер­ҙағы художестволы фильмдар).
3. Дуҫлыҡ республикаһы (мил­ләт-ара һәм конфессия-ара мөнәсәбәттәрҙә мәҙәниәтте һаҡ­лауға ярҙам итеү тураһындағы проекттар).
4. Хәҙерге заман мәҙәниәт коды (республиканың һәм уның халҡының бөгөнгө йәшәйешенә һәм уларҙың проблемаларына, уңыштарына арналған проекттар).
5. “Башҡортостан - 2030” – республика киләсәктә (республика­ның киләсәгенә һәм потенциаль үҫеш юлына арналған проекттар).
6. Әҙәби мираҫ (башҡорт әҙәбиәтен һәм драматургияһын экранға сығарыу, шулай уҡ рес­публикалағы халыҡтарҙың әҙә­биәтен һәм драматургияһын яҡтыртыу) .
7. Гражданлылыҡ (социаль проекттарҙы тормошҡа ашыр­ғанда коммерцияға ҡарамаған ойошмаларҙың эшмәкәрлеген күр­һәтеү, социаль үҙгәрештәр бары­шындағы лидерҙарҙың яҙмыш­тары тураһындағы проекттар).
8. Геройҙар заманы (ҡатмарлы экстремаль хәлдәр ваҡытында үҙҙәрен лайыҡлы һәм ыңғай яҡтан күрһәткән кешеләр һәм илһөйәр­лекте популярлаштырыуға йүнәл­телгән проекттар).
9. “Атайсал” – изге ғәмәлдәр (үҙҙәренең кесе ватандарының үҫешенә ҙур өлөш индергән кеше­ләр һәм, республиканан ситтә йәшәп, тыуған ерҙәрен бар яҡлап та яҡлаған һәм ярҙам күрһәткән кешеләр тураһындағы проекттар).
10. Һинең тауышың (электораль мәҙәниәтте күтәреү йүнәле­шен­дәге проекттар).

“Башҡортостан кино индустрия­һын үҫтереү өсөн авторҙарҙың һәм жанрҙарҙың төрлөлөгө зарур. Беҙҙең өсөн йәш, һәләтле кине­матографистарҙы асыу һәм ҡеүәт­ләү мөһим. Бигерәк тә үҙҙәренең проекттарын тормошҡа ашырыу өсөн финанс мөмкинлектәре бул­маған йәш режиссерҙарға ярҙам итергә кәрәк. Шуға ла, конкурсҡа һығымта яһағанда, Башҡортостан кинематографияһында яңы исем­дәр асылыр, тип өмөт итәм”, –  тине Ә. Абдразаҡов исемендәге “Башҡортостан” киностудияһы директоры Юнир Әминев.

Декабрҙә конкурсҡа һөҙөмтә яһаласаҡ. Еңеүселәрҙең фильм­дары 2024 йылдың 1 ғинуарынан төшөрөлә башлаясаҡ. Ҡыҫҡа метражлы фильмдар 2024 йылдың 31 авгусына төшөрөлөп бөтөргә тейеш, ә тулы метражлы фильм­дар – 2026 йылдың 31 декабренә тиклем.

Милли кино сәнғәтенә битараф булмағандар, ашығығыҙ! Бәлки, тап һеҙҙең кинопроект еңеп сығыр һәм республика халҡына был фильмды ҡарау бәхете тейер.

- Таңсулпан БАЙТИМЕРОВА