Кино төшөрөү өсөн гранттар конкурсына старт бирелде

1 августа быйылғы йылда уҙғарыласаҡ кино өлкәһендәге проекттар өсөн гранттар конкурсына ғаризалар ҡабул итеү башланды. Конкурсты Башҡортостан Республикаһының Гранттар фонды һәм Ә. Абдразаҡов исемендәге “Башҡортостан” киностудияһы уҙғара.

Был турала Башҡортостан Башлығы Радий Хәбиров: “Үҙебеҙҙең ҡыҙыҡлы, яҡты башҡорт кинолары күберәк булыуын теләйем. Бигерәк тә төрлө жанрҙағы яңы фильмдар барлыҡҡа килһен һәм кино һөйөүселәргә уларҙы күрергә мөмкинлек булһын ине. Был коллектив Көнбайыш менән ҡаршылыҡ фонында зиһендәр өсөн көрәш шарттарында айырыуса мөһим. Ә инде үҙебеҙ төшөргән кино һәр тамашасыға барып етһен өсөн, республика буйлап кино залдарын асыуҙы дауам итәбеҙ”, – тине.

Иҫегеҙгә төшөрәбеҙ, Башҡортостан Республикаһының Гранттар фонды, Радий Хәбировтың ҡарары буйынса кинематография өлкәһендәге проекттарҙы ҡеүәтләү маҡсатында, махсус конкурсҡа 50 миллион һум бүлде.

Был аҡсаны нисек юллап алырға була?

Коммерция нигеҙендә дәүләт ойошмаһы булмаған, йәғни ойошманың составында дәүләт органдарының учредителдәре булмаған, иҡтисади эшмәкәрлеге ОКВЭД буйынса кинематографияға бәйләнгән һәм бер йыл элек теркәлгән ойошмалар конкурсҡа ғариза яҙа ала.

Улар быйыл 1 августан 1 сентябргә тиклем ҡабул ителә. Ҡағиҙәгә ярашлы, документтарҙан башҡа,  ғаризаға фильмдың презентацияһын һәм сценарийын да индерергә кәрәк.

Грантглавы102.рф сайтында ғаризаны теркәргә һәм конкурстың положениеһы менән ныҡлап танышырға була.

Ғаризалар түбәндәге 10 йүнәлеш буйынса ҡабул ителә:

1. Тарихи һәм мәҙәни хәтер (күренекле шәхестәргә, Башҡортостан һәм Рәсәй тарихындағы мөһим мәҙәни һәм тарихи ваҡиғаларға, төп дәүләт байрамдары һәм иҫтәлекле ваҡиғаларға арналған проекттар).
2. Балаларға – иң мөһим мәл тураһында (тәрбиәүи характерҙағы художестволы фильмдар).
3. Дуҫлыҡ республикаһы (милләт-ара һәм конфессия-ара мөнәсәбәттәрҙә мәҙәниәтте һаҡлауға ярҙам итеү тураһындағы проекттар).
4. Хәҙерге заман мәҙәниәт коды (республиканың һәм уның халҡының бөгөнгө йәшәйешенә һәм уларҙың проблемаларына, уңыштарына арналған проекттар).
5. “Башҡортостан-2030” – республика киләсәктә (республиканың киләсәгенә һәм потенциаль үҫеш юлына арналған проекттар).
6. Әҙәби мираҫ (башҡорт әҙәбиәтен һәм драматургияһын экранға сығарыу, шулай уҡ республикалағы халыҡтарҙың әҙәбиәтен һәм драматургияһын яҡтыртыу).
7. Гражданлылыҡ (социаль проекттарҙы тормошҡа ашырғанда коммерцияға ҡаралмаған ойошмаларҙың эшмәкәрлеген күрһәтеү, социаль үҙгәрештәр барышындағы лидерҙарҙың яҙмыштары тураһындағы проекттар).
8. Геройҙар заманы (ҡатмарлы экстремаль хәлдәр ваҡытында үҙҙәрен лайыҡлы һәм ыңғай яҡтан күрһәткән кешеләр һәм илһөйәрлекте популярлаштыуға йүнәлтелгән проекттар).
9. “Атайсал” – изге ғәмәлдәр (үҙҙәренең кесе Ватандарының үҫешенә ҙур өлөш индергән кешеләр һәм, республиканан ситтә йәшәп, Тыуған ерҙәрен бар яҡлап та яҡлаған һәм ярҙам күрһәткән кешеләр тураһындағы проекттар).
10. Һинең тауышың (электораль мәҙәниәтте күтәреү йүнәлешендәге проекттар).

Еңеүселәр өсөн гранттың  иң ҙур күләме 15 миллион һум тәшкил итә.

Фотолар: Автор фотоһы һәм Грантглавы102.рф сайтынан.