"Килен"де күршеләргә лә күрһәтәбеҙ

Ике йыл һайын Мәжит Ғафури исемендәге Башҡорт академия драма театры Ҡазан тамашасыһына үҙенең иң популяр һәм премьера спектаклдәрен тәҡдим итә. Был юлы ла театр үҙ традицияларына тоғро ҡалып, 14-19 ноябрҙә Ғәлиәскәр Камал исемендәге Татар дәүләт академия театры сәхнәһендә сығыш яһаясаҡ.

“Беҙҙең Ҡазанға гастролдәребеҙ Башҡортостан Республикаһының Мәҙәниәт министрлығы булышлығында үтә. Бөгөн унда коллективтың яртыһы тиерлек – артистар, техник цех хеҙмәткәрҙәре һәм балалар менән дөйөм 104 кеше ҡатнаша. Әйткәндәй, был бигерәк тә 104-се театр миҙгеле өсөн символик күренеш. Гастролдәребеҙ юғары кимәлдә үтер тип ышанабыҙ”, – тине театр директоры Иршат Фәйзуллин.

Алты гастроль көнөндә 15 сара — Камал театры сәхнәһендә 11 спектакль, шул иҫәптән “Килен” спектакле, өс күсмә спектакль һәм Рәсәй Геройы генерал Миңлеғәле Шайморатовҡа арналған ижади осрашыу ҡаралған.

“Актерҙарыбыҙ Ҡазанға гастролдәргә ҙур теләк менән сыға. Башҡортостандың һәм Татарстандың ике академия театры араһында дуҫлыҡ күп йылдар дауам итә һәм яңы быуын артистарының был традицияны дауам итеүе ҡыуаныслы. Ошо көндәрҙә беҙҙең коллектив хатта Камалов театрындағы коллегаларына һәм тамашасыларына йырлы видеосәләм төшөрҙө, ул социаль селтәрҙәрҙә ҙур резонанс һәм бик күп реакциялар алды, ике көн эсендә 120 мең ҡарау йыйҙы”, — тип билдәләне театрҙың баш мөхәррире Динара Ҡәйүмова.

Фото: Мәжит Ғафури исемендәге Башҡорт дәүләт драма театрының матбуғат хеҙмәтенән.