Радик Юлъяҡшин: "Евразия йөрәге" – махсус хәрби операцияға ярҙам итеү сараһы

– Үҙем махсус хәрби операция биләмәһендә бер нисә тапҡыр булдым. Күрешеп аралашҡан  саҡта  яугирҙәр, квадрокоптерҙар  кәрәк, тигәйне. Бөгөнгө гонорарымды шуға йүнәлтәсәкмен. Иң ҡыуандырғаны – был ниәтте Заһир Зәйнетдинов, Полина Гагарина һәм Олег Газманов та хупланы. Шулай итеп, бөгөнгө концертты махсус хәрби операцияға ярҙам сараһы тип атарға була, – тине билдәле йырсы.

Башкортостандың атҡаҙанған артисы Заһир Зәйнетдинов Курск өлкәһе халҡына ярҙам итергә теләк белдерҙе.

– Махсус хәрби операция биләмәһендә бер нисә тапҡыр булғаным бар. Яугирҙәргә машина һатып алып та ебәрҙем, үҙҙәре менән гел бәйләнештәмен, араларында дуҫтарым да бар, – тине “ZAINETDIN” этнопроекты етәксеһе Заһир Зәйнетдинов.

“Евразия йөрәге” кисә асылғайны. Бөгөнгө концертта  Рәсәйҙең атҡаҙанған, Башҡортостандың халыҡ артисы Алһыу, Башҡортостандың халыҡ артисы Радик Юлъяҡшин (Элвин Грей), HammAli & Navai рэп-дуэты, ZAINETDIN менән “Hazina” этно-проекттары, Өфөнән хип-хоп  башҡарыусылар Rena RNT һәм Rody Dillon ҡатнашты. “Евразия йөрәге – 2024” Рәсәйҙең һәм Башҡортостандың халыҡ артисы Николай Басковтың сығышы мәнән тамамланды.

Фестиваль быйыл һигеҙенсе тапҡыр уҙа. Ул Рәсәйҙең иң яҡшы 10 фестивале исемлегенә инә . Асыҡ һауалағы мәҙәни ваҡиға Өфөнөң 450 йыллығына арналды. Бөгөнгө концерт фестиваль тарихындағы иң күп тамашасыны йыйҙы - ойоштороусылар әйтеүенсә, "Ватан" амфитеатрына 85 меңдән ашыу кеше килгән.