Беҙҙең ҡурайсылар "Бригада" сериалынан да текәрәк!

Быйыл март айында Башҡортостан Башлығы Радий Хәбировтың указына ярашлы, Башҡортостан дәүләт ҡурайсылар ансамбле булдырылды. "Мәҙәниәт буйынса советта ҡурайсыларҙың дәүләт ансамблен булдырыу тураһында күп мөрәжәғәттәр килде. Беҙ мәҙәниәт министры Әминә Шафиҡова менән был йәһәттән ҡеүәтте тикшерҙек. Мәктәптәр ҙә бар, көслө артистар ҙа күп. Шулай булғас, бөгөнгө көндө республиканың дәүләт ҡурайсылар ансамблен булдырыу көнө тип иҫәпләргә була", – тигәйне Радий Хәбиров 11 мартта үткән кәңәшмәлә.

Яңы барлыҡҡа килгән ансамблде күренекле ҡурайсы, Рәсәйҙең атҡаҙанған, Башҡортостандың халыҡ артисы Азат Айытҡолов етәкләй. Улар социаль селтәрҙә тәүге клиптарын төшөрөүе тураһында ла белдерҙе. Унда «Ҡағы ташы», «Атлы ғәскәр маршы», «Йәнтүрә маршы» һәм башҡорт халҡының гимны «Урал» көйҙәре яңғырай. 

Ошо көндәрҙә социаль селтәрҙәрҙә Дәүләт ҡурайсылар ансамбленә ҡағылышлы тағы бер видеояҙма таралды. "Текә!" тип әйтеү генә лә аҙ, был хатта "Бригада"нан да тәьҫирлерәк! Сөнки улар - ҡурайсылар! Улар беҙҙең башҡорттоҡо! Ҡурай - ул көс! Рух, ырыу көсө, башҡорт күңеленең ҡеүәте һәм энергияһы!" тип яҙҙылар әлеге видеоға бәйле яҙмала.  

Фото: видеонан скриншот.