Башҡорт музыкаһының алтын биттәре

22 февралдә Башҡортостандың Дәүләт оркестры «Башҡорт музыкаһының алтын биттәре» программаһын тәҡдим итә. Бында бөгөн республика композиторҙар мәктәбенең ғорурлығы булып торған замандаштарыбыҙҙың – Рөстәм Сабитов һәм Нур Дауытовтың әҫәрҙәре яңғырай.

Рөстәм Сабитовтың ижады Мостай Кәримдең «Ташлама утты, Прометей» трагедияһы буйынса «Прометей» симфоник фрескалары һәм 2000-2001 йылдарҙа ижад ителгән 7-се, 8-се симфонияларҙың премьераһы аша күрһәтелә. Нур Дауытов был кистә 3-сө симфонияны, Ф.Бүләковтың «Һөйәһеңме - һөймәйһеңме» спектакленә музыканан «Фатима» лирик пьесаһын һәм симфония оркестры өсөн «Сәскә атҡан раузалар» фантазияһын тәҡдим итә.

Концертта Башҡортостандың халыҡ артисы, халыҡ-ара һәм бөтә Рәсәй конкурстары лауреаты Әлфиә Кәримова (сопрано) ҡатнаша. Оркестрҙың дирижеры – Башҡортостандың халыҡ артисы Дмитрий Крюков.

«Башҡорт музыкаһының алтын биттәре» программаһын ойоштороусылар республика мәҙәниәтен һәм сәнғәтен үҙ итеүселәрҙе Өфө сәнғәт училищеһының (колледжының) концерт залында көтә. Концерт киске сәғәт 5-тә башлана. Тулыраҡ мәғлүмәт – www.gasorb.ru сайтында. Юғары сәнғәт өлгөһө булған классик музыканы тыңларға яратҡан үҫмерҙәр, йәштәр Башҡортостан Дәүләт оркестрының бөтә концерттарын да Пушкин картаһын файҙаланып ҡарай ала.

Мәғлүмәт, фото: gasorb.ru/events/...