“Мин – йәш шәһитсе” журналының исем туйы булды

28 февралдә Ш. Хоҙайбирҙиндың музей-йортонда башҡорт медиамәктәбенең “Мин – йәш шәһитсе” журналының исем туйы булды. Баҫма Башҡортостан Республикаһы гранттары фонды ярҙамында нәшер ителгән.

Йыйынтыҡта медиамәктәп спикерҙарының башҡорт журналистикаһы серҙәре тураһындағы материалдар, шулай уҡ балаларҙың – медиамәктәптә ҡатнашыусыларҙың - мәҡәләләре баҫылған.

Презентация ваҡытында Башҡортостандың Журналистар союзы рәйесе Вәдүт Исхаҡов медиамәктәп эшендә ҡатнашҡан 15 ҡыҙ һәм малайға “Мин – йәш шәһитсе” тигән танытманы тапшырҙы.

Шулай уҡ журналистика буйынса күнекмәләр булды, балалар баҫмаһы, фото һәм видеоконтент, версткаға һәм журнал дизайнына әкиәттәр әҙерләнә башланды. Оҫталыҡ дәрестәрендә Өфөләге М. Исҡужин исемендәге 136-сы башҡорт лицейы уҡыусылары ҡатнашты.

Алмас Вәлиев, Юлбарсын Карсагова, Сулпан Вәлиева – проекттың иң йәш ҡатнашыусылары. Улар әле мәктәпкә лә йөрөмәй, әммә беренсе әҫәрҙәрен, әкиәттәрен һәм иншаларын әсәйҙәренә диктовка аҫтында яҙҙыралар. Проект авторы, “Аҡбуҙат” журналының баш мөхәррире Лариса Абдуллина: “Балаларҙы бәләкәй саҡтан һүҙ, һүҙ сәнғәтенә өйрәтергә кәрәк. Һүҙ – фекерләүгә йоғонто яһаған иң көслө ҡорал. Шуға күрә башҡорт журналистикаһының йәш кадрҙарын балалар баҡсаларында эҙләйбеҙ”, тине.

Башҡортостандың халыҡ шағиры Марсель Сәлимов, балаларҙы сәләмләп, уларҙы йәш коллегалары тип атаны һәм уңыштар теләне.

Сығанаҡ, фотолар: Рита Стеничкина.