Асҡын конкурсанты донъяға йәм өләшеп йәшәй

Конкурсанттарыбыҙ береһенән-береһе талантлы, уңған булып сыҡты. Уларҙың һәр ҡайһыһы менән ҙур ҡәнәғәтлек менән таныштырабыҙ. Сираттағы конкурсантыбыҙ - Асҡын районынан Ғәзимә Зәйнетдинова. Ул Әмир ауылының мәҙәниәт йорто етәксеһе. Был вазифаны башҡарыуы осраҡлы түгел. Йыр-моң уның ҡанына һеңгән.

- Үҙемде белә-белгәндән ауыл концерттарында ҡатнашып йөрөйөм. Йыр-моңға һөйөү атай-әсәйемдән килә. Бер туғандар барыбыҙ ҙа йырлай, балаларыбыҙ мәҙәни яҡтан һәләтле, - тине Ғәзимә ханым.

Күптән түгел район кимәлендә уҙғарылған "Минең бәхетле ғаиләм"  конкурсында ғаилә ансамбле менән йырлап, “Алтын ғаилә" номинацияһында еңеүгә өлгәшеүҙәре лә нәҫелдәренең моңло булыуы тураһында һөйләй.

Конкурсантыбыҙ почтала ла хеҙмәт иткән, һуңғы йылдарҙа клуб мөдире вазифаһын башҡара. Ауылдағы барлыҡ мәҙәни, тарихи, илһөйәрлек сараларын ойоштороусы ул беҙҙең конкурсантыбыҙ. Төрлө экологик өмәләрҙән, “Йәшел Башҡортостан” акцияларынан да ситтә ҡалмай.  

Ғәзимә ханым аш-һыуға ла бик оҫта. Торттарҙың, бәлештәрҙең ниндәйен генә бешермәй. Уның мейестә бешергән икмәге, ҡоймаҡтары ла телде йоторлоҡ.

Урманда еләк-емеш йыйып, тәбиғәттә  йөрөү ҙә уның күңеленә оҡшаған шөғөлдәренең береһе. Донъяға йәм өләшеп, яҡташтарының күңеленә рух өҫтәп йәшәгән Ғәзимә Зәйнетдиноваға беҙҙең конкурста ла уңыштар насип булһын.

Фото: Ғәзимә Зәйнетдинова архивынан.