Яңы китап магазины милли мәҙәниәт үҙәгенә әйләнде

“Китап” нәшриәтенең яңы магазины башҡорт мәҙәниәтенең мөһим үҙәгенә әйләнде. Ул республика Башлығы Радий Хәбиров ярҙамы менән асылғайны.

Китап кибете хәҙер яҙыусылар, нәшриәтселәр һәм уҡыусыларҙы берләштергән урынға әйләнде, тип белдерҙе Хөкүмәт кәңәшмәһендә республиканың Матбуғат һәм киң мәғлүмәт саралары агентлығы етәксеһе Максим Ульчев. “Китап” нәшриәте Рәсәйҙә милли китаптар баҫтырыу буйынса алдынғы урында бара. Ул бөтә стандарттарға ла яуап биргән, хаҡы ла ҡиммәт булмаған баҫмалар сығара. Былтыр нәшриәт 16 наградаға лайыҡ булған. Бындағы эштең төп маҡсаты – республика халҡын сифатлы милли әҙәбиәт менән тәьмин итеү.

Баш ҡалабыҙҙың тарихи үҙәгендә урынлашҡан “Китап” магазинының сауҙа залы ғына түгел, заманса йыһазландырылған майҙансығы ла бар. Бында төрлө әҙәби кисәләр үтә. Бер йыл эсендә генә лә бында 80 сара үткәрелгән.

Башҡортостан китаптарын Рәсәйҙә лә, сит тарафтарҙа ла үҙ итәләр. Башҡа нәшриәтттәрҙә китабы донъя күргән авторҙар ҙа ярҙамһыҙ ҡалмай. Быға асыҡ миҫал – тиҙҙән “Китап” магазинында Мөнир Ҡунафиндың АСТ нәшриәтендә баҫылып сыҡҡан “Я вышел из боя живым» китабын да күрергә була.

Мәғлүмәт, фото: “Башинформ”.