Тарихи-мәҙәни матбуғат баҫмалары редакторҙары осрашасаҡ

1 июндә, «Китап байрамы» III халыҡ-ара китап йәрминкәһенең эшлекле программаһы сиктәрендә, Башҡортостан Республикаһы милли музейы майҙансығында редакторҙар һәм нәшриәттәрҙең осрашыуы үтә, ул «Мираҫ биттәре: Башҡортостандың хәҙерге медиа киңлегендә баҫмаларҙың роле»  тип аталасаҡ. Осрашыуҙа Башҡортостандың патриотик йүнәлешен һәм тарихи-мәҙәни мираҫын популярлаштырыу,  уҡыусылар араһында талап ителгән заманса сифатлы контент булдырыу, «һанлы» контент индереү, Башҡортостандың нәшриәт эшендә механизмдарҙы һәм инструменттарҙы, уңышлы проекттарҙы һәм ижади башланғыстарҙы тикшереү, йәштәр аудиторияһын йәлеп итеү һәм баҫмаларҙы алға ебәреү проблемалары буйынса һөйләшеүҙәр үткәрелә.  

 “Хәҙерге заманда, тарих һәм мәҙәниәт ғәмәлдә пропаганда ҡоралына әйләнгәндә, тарихи -мәҙәни мираҫты популярлаштырыуҙа ваҡытлы баҫмаларҙың роле һәм әһәмиәте арта. Башҡортостан Республикаһында төбәгебеҙ тарихына һәм мәҙәниәтенә арналған егермегә яҡын фәнни, ғилми-ғәмәли һәм фәнни-популяр ваҡытлы баҫма бар. Уларҙың барыһы ла, бер яҡтан, мираҫты дөйөм күрһәтеү һәм популярлаштырыу йүнәлешендә эшләй, икенсе яҡтан, һәр баҫманың үҙенсәлекле коды, уҡыусылар менән аралашыу ысулдары бар. Тап тәжрибә уртаҡлашыу, көнүҙәк контентты тикшереү һәм бер өлкә белгестәренең аралашыуы өсөн уңайлы мөхит булдырыу өсөн ошо осрашыуҙы ойошторабыҙ», – тип билдәләне сараның модераторы, тарих фәндәре кандидаты, Башҡортостан Республикаһы милли музейының «Башкирский край» журналы баш мөхәррире Светлана Воробьева.

Сара 2025 йылдың 1 июнендә, 11:00 сәғәттән 12:00 сәғәткә тиклем, Өфө ҡалаһы, Совет урамы, 14-се йорт адресы буйынса үтә.