Еңеү килтергән йөҙҙәр

Ҡырмыҫҡалы районында үҙ заманының билдәле фотохәбәрсеһе Вячеслав Стрижевскийҙың "Лица Победы" тип аталған фотокүргәҙмәһе асыла. Ул Бөйөк Еңеүҙең 77 йыллығына арнала.

Ҡырмыҫҡалы – Рәсәй Геройы, 112-се Башҡорт кавалерия дивизияһы командиры Миңлеғәле Шайморатовтың тыуған ере. Легендар генералдың портреттары экспозицияла айырым урын биләй.

Фотоһүрәттәрҙең авторы Вячеслав Стрижевский – билдәле фотохәбәрсе, йәмәғәт эшмәкәре, Рәсәйҙең, Башҡортостандың атҡаҙанған мәҙәниәт хеҙмәткәре. "Еңеү йөҙҙәре" – Бөйөк Ватан һуғышы ветерандарының нәфис фотопортреттарынан торған документаль галерея. Ул – илдең тарихи йылъяҙмаһындағы үлемһеҙ ҡаһарманлыҡ, һуғыштан һуңғы йылдарҙа Ватанды үҫтереүгә күп көс һалған кешеләр тураһындағы сәхифә. Автор үткән менән бөгөнгөнө тоташтырған фото-тарих ижад иткән.

Был күргәҙмә – һуғыш, Бөйөк Еңеү хаҡына бөтә көстәрен, хатта ғүмерҙәрен һалған ата-бабаларыбыҙ фиҙакәрлеге хаҡында хәтирә.

"Еңеү йөҙҙәре" проектының маҡсаты – Бөйөк Ватан һуғышы ветерандарының оло шәхесен юғары сифатлы фотопортреттарҙа сағылдырыу. Йәмғиәткә Еңеүҙең ысын йөҙөн – үҙҙәрен һуғыш яланында ла, тыныс тормошта ла лайыҡлы күрһәткән көслө рухлы, сағыу яҙмышлы кешеләрҙе асыу.

Күргәҙмә 22 апрелдән 21 майға ҡәҙәр эшләй.

Фото: "Башинформ".