Алма ашайым тиһәң, алмағасты ашат

Алмағастар һәйбәт уңыш бирһен өсөн уларҙы яҙғыһын туҡландырып алырға кәрәк. Быны нисек эшләргә? Ниндәй ашламалар һайларға? Был һорауға Рәсәй ауыл хужалығы үҙәге белгесе Фирҙәүес Аҫылбаева яуап бирә:

- Әлеге мәлдә алма һәм груша ағастарын азот ашламалары менән туҡландырырға кәрәк. Бының өсөн 10 литр һыуға ике аш ҡалағы мочевинаны иретеп ағас төбөнә ҡойорға кәрәк. Бер ағасҡа ошо етә.

Май-июнь айҙарында ағастарҙы фосфор-калий ашламалары менән туҡландырабыҙ. Ике аш ҡалағы әҙер ашламаны 10 литр һыуҙа иретергә кәрәк. Ағастың йәшенә ҡарап, ашламаның күләмен дә арттырырға була. Ҙур ағастарға 20 – 30 литр самаһы шыйыҡса кәрәк. Махсуслаштырылған ҡоро ашламаны һәр ағастың аҫтына икешәр аш ҡалағы һибеп сығырға була.

Ашламалар ҡулланыуҙан ҡурҡмағыҙ. Беҙҙең һауа шарттарында шунһыҙ мөмкин түгел.