Яҙын алмағастар ашлама һорай

Әлеге мәлдә алма һәм груша ағастарын азот ашламалары менән туҡландырырға кәрәк. Бының өсөн 10 литр һыуға ике аш ҡалағы мочевинаны иретеп ағас төбөнә ҡойорға. Бер ағасҡа бер биҙрә етә.

Май-июнь айҙарында ағас­тарҙы фосфор-калий ашламалары менән туҡландырабыҙ. Ике аш ҡалағы матдәне 10 литр һыуҙа иретергә кәрәк. Ағастың йәшенә ҡарап, ашламаның күләмен дә арттырырға була. Ҙур ағастарға 20 – 30 литр  самаһы шыйыҡса етә. Махсус­лаштырылған ҡоро ашламаны һәр ағастың төбөнә икешәр аш ҡалағы һибеп сығабыҙ.

Ашламаларҙы ҡулланыуҙан ҡурҡмағыҙ. Беҙҙең һауа шарттарында шунһыҙ мөмкин түгел.

Ғәлиә МӨҒӘЛИМОВА, Борай районының “Алмағас” питомнигы хужабикәһе:

 – Баҡсаны ҡорот­ҡос­тарҙан һаҡлауҙың тағы бер һәйбәт ысулы – дарыу һип­тереү. Быны дүрт этапта башҡарырға кәрәк. Тәүгеһен бөрөләр бүрткәс башларға кәрәк. Икенсе этап бөрөләр асылғас башлана, сөнки йәшелләнеп сыҡҡан япраҡтар – ҡоротҡостар өсөн иң тәмле аҙыҡ. Өсөнсө этап – ҡыуаҡтар һәм ағастар сәскә атыр алдынан. Тик улар сәскә атты икән, дарыу һиптерергә ярамай. Ағыуы емештең уртаһында тороп ҡаласаҡ. Дүртенсе этап – сәскә атҡандан һуң.

Алмағас – баш бармаҡ тырнағы хәт­лем, ҡарағат һәм крыжовник борсаҡ хәт­лем булғас, дарыу һиптерегеҙ. Ағас­тарҙы тулыһынса эшкәртергә кәрәк – осонан алып олононоң төбөнә тиклем. Бер ҙур ағасҡа 5-6 литр, ҡыуаҡҡа 1-1,5 литр дарыу сарыф ителә. Препа­рат­тарға килгәндә иһә, ҡоротҡостарҙың күпсе­легенә ҡаршы көрәшкәнен алырға кәрәк. Ағыу буласаҡ уңышҡа насар тәьҫир итер, тип ҡурҡмағыҙ, уларҙың һәр береһенең үҫентеләрҙе һаҡлау ваҡыты сикләнгән.

Лилиә НУРЕТДИНОВА