"Аяғың тапылдамаһа, ауыҙың шапылдамаҫ"

Бөрйән районының Ҡотан ауылында йәшәгән Ғәйшә Ғәлина - гәзитебеҙҙең "Бәйләнештә" төркөмөндә барған "Быяла эсендә уңыш" конкурсының киләһе ҡатнашыусыһы. 23 йыл мәктәптә ашнаҡсы булып эшләп хаклы ялға сыҡҡан. Ғүмер буйы яратып баҡса үҫтерә.

- Йыл буйына етерлек банкалар эшләп алам, балаларыма ла, туғандарға ла күстәнәскә китеп ултыра. Ҡыяр, помидор өлгөргәнен түҙемһеҙлек менән көтөп алам. Аяғың тапылдамаһа, ауыҙың шапылдамаҫ, тип бушҡа ғына әйтмәйҙәр бит, - ти Ғәйшә апай.

 Тәүге ҡыярҙар өлгөрә башлау менән уңған хужабикәнең аш-һыу бүлмәһендә күңелле мәшәҡәттәр башлана.

Бик күп банкалары баҙға төшөп ултырған да инде. Төшмәй ҡалғандары ла етәрлек. Ҡайнатмалар, салаттар, компот, ҡыяр, мохито, икра... - нимә генә юҡ. Туңдырғыстар емеш-еләк, заготовкаларҙан һығылып тора. Бәшмәктең туңдырылғаны тиһеңме, маринадланғанымы. Һөт ризыҡтары ла туңдырғысҡа етәрлек төшөп ятҡан.

- Алла бирһә донъялар имен булып, балаларым, ейән-ейәнсәрҙәрем, бабайым, туғандарым, дуҫтар, ҡунаҡтар менән татыулыҡта, бергә-бергә имен-һау ашарға яҙһын, - ти конкурсантыбыҙ.

Ғәйшә Ғәлина өсөн тауыш биреү өсөн https://vk.com/gazetabashkortostan?w=wall-104965500_250088 һылтанмаһы аша үтергә.

Фотолар конкурсанттың шәхси архивынан.