Өшөгән үҫемлектәрҙе нисек терелтергә?

Майҙа беҙҙә ҡар ҙа яуа, ҡырау ҙа төшә. Тәжрибәле баҡсасы Фәриҙә Зәйнуллина өшөгән баҡса үҫемлектәрен терелтеү буйынса белемен уртаҡлаша. 

"Үҫемлектәргә ҡырау төшөүе - яҙғыһын иң ҡурҡынысы. Әгәр һеҙ сәскәнегеҙҙе һаҡлап ҡала алмаһағыҙ, үҫентеләр өшөһә, ошо ике ысул тиҙ арала уларҙы тергеҙергә ярҙам итер:

1. Баҡсаға үҫеш стимуляторҙары һиптерегеҙ. Был ҡатнашма йәшелсә өсөн дә, емеш-еләк культуралары өсөн дә ҡулай: гәрәбә (янтарь) кислотаһы (10 литр һыуға бер грамм матдә нисбәтендә), "Эпин Экстра" (10 литрға - ике миллилитр) йәки "Стимул" (10 литрға - 100 миллилитр). Эшкәрткәндән һуң үҫемлектәрҙе сағыу ҡояш яндырмауын хәстәрләгеҙ, уларҙы күләгәләгеҙ. Зыян ныҡ ҡына булһа, 5-7 көндән ошо уҡ состав менән йәнә эшкәртегеҙ.

2. Үҫентеләрҙе туҡландырығыҙ. Үҫемлектәр ер өҫтөндәге өлөшөн мөмкин тиклем тиҙерәк тергеҙһен өсөн, уларға азот бирегеҙ. Минераль ашлама - 10 литрға 20 грамм иҫәбенән мочевина, нитрофоска, аммиак селитраһын, шулай уҡ органика - ҡош тиҙәген (1:20 нисбәтенән), һыйыр тиҙәген (1:10 нисбәтенән), үлән төнәтмәһен (1:10 нисбәтенән) ҡулланырға мөмкин.

Өшөгән үҫемлектәр һау-сәләмәттәренән үҫештә бер аҙ артта ҡаласаҡ, әммә яҡшы итеп тәрбиәләгәндә күтәрелеп китәсәк һәм барыбер уңыш бирәсәк.

Фәриҙә Зәйнуллина фотоһы.