+33 °С
Ясно
Башҡорт донъяһы
27 Декабря 2019, 08:14
Донъя башҡорттары тупланды
Башҡортостанға 100 йыл тулыу, бөйөк шағир Шәйехзада Бабичҡа һәйкәл асылыу кеүек мөһим ваҡиғалар менән бер рәттән, Ер шарының төрлө төбәктәрендә йәшәгән башҡорттарҙы бер урынға туплаған V Бөтә донъя башҡорттары ҡоролтайы ла тарихҡа инде.
Башҡортостанға 100 йыл тулыу, бөйөк шағир Шәйехзада Бабичҡа һәйкәл асылыу кеүек мөһим ваҡиғалар менән бер рәттән, Ер шарының төрлө төбәктәрендә йәшәгән башҡорттарҙы бер урынға туплаған V Бөтә донъя башҡорттары ҡоролтайы ла тарихҡа инде.
27-29 июндә Өфө ҡалаһында уҙған Бөтә донъя башҡорттары ҡоролтайында йәмғеһе 600 делегат ҡатнашты. Унда ил ғәмен, милләт мәсьәләләрен уртаға һалып һөйләштеләр. Дөйөм мәғлүмәттәр буйынса, делегаттарҙың яртыһы тиерлек Башҡортостандың үҙенән булһа, 157 вәкил – Рәсәй төбәктәренән. 50 делегат АҠШ, Швейцария, Голландия, Монако, Израиль, Латвиянан һәм башҡа дәүләттәрҙән, йәмғеһе 21 илдән килгәйне.
V Бөтә донъя башҡорттары ҡоролтайының пленар ултырышында Башҡортостан Башлығы Радий Хәбиров ҡатнашты һәм башҡорт теленә ҡағылышлы проблемаларҙы ла билдәләне.
Беренсе көндә делегаттар төрлө темаларға арналған ҡорҙарға бүленеп төплө һөйләшеүҙәр алып барҙы, иртәгәһенә уларҙың барыһын да Ишембай ере – изге Торатау ҡаршы алды. Ҡоролтайҙың Башҡарма комитетының ултырышынан тыш, “Торатау йыйыны” республика фольклор байрамы Сармат-шоу, “Арғымаҡ”, “Каруанһарай”, “Дәрүишхан” кеүек легендар төркөмдәрҙең сағыу сығыштары менән иҫтә ҡалды.
