+24 °С
Ямғыр
Башҡорт донъяһы
22 Март 2021, 05:30
Сочи башҡорттары әүҙемләшә
Был ҡалала йәшәгән милләттәштәребеҙ үҙаллы мәҙәни үҙәккә берләшкән һәм милли рухтағы төрлө саралар уҙғара
Был ҡалала йәшәгән милләттәштәребеҙ үҙаллы мәҙәни үҙәккә берләшкән һәм милли рухтағы төрлө саралар уҙғарырға, телен һәм ата-бабалар йолаларын һаҡларға, үҫеп килгән быуынға күрһәтергә тырыша.
Күптән түгел улар Наурыҙ байрамында ихлас ҡатнашты. Сочиҙағы ҡаҙаҡ, татар, үзбәк, әзербайжан һәм башҡа милләт вәкилдәре менән берлектә милли аш-һыу әҙерләү, костюмдар күрһәтеү, концерт номерҙары менән сығыш яһау кеүек конкурстарҙа әүҙем ҡатнашты.
– Беҙ – башҡорт диаспораһы – бөтә номинацияларҙа ла һыр бирмәнек, жюри ағзалары ла һоҡланыуын йәшермәне, – ти Сочи башҡорттарының мәҙәни үҙәге ағзаһы Айсилә Ҡарасурина. – Костюмдар буйынса беренсе урын беҙҙеке булды! Милли ризыҡтар буйынса үзбәктәрҙән ҡала икенсе урынды алдыҡ. Беҙҙең концерт номерҙарын иң яҡшылары тип танынылар, күп кенә Рәхмәт хаттары тапшырҙылар! Ә бит был – беҙҙең яңы ойошҡан диаспораның халыҡ алдындағы тәүге шундай сығышы! Мин үҙебеҙҙең һәләтле йәштәр һәм уларҙы дәртләндереп торған оло йәштәге яҡташтарыбыҙ менән ғорурланам.
Фото: Айсилә Ҡарасуринаның шәхси архивынан.
