+24 °С
Ямғыр
Башҡорт донъяһы
27 Апрель 2021, 16:03
Беҙ – ғәйнәләр
Мин балалар һәм йәш ҡәләмдәштәр ижадын йыйыуға бик теләп тотондом. Түңәрәктә генә башланған эш арыу ғына бер йыйынтыҡҡа әүерелде. Нәзәкәтле телдә яҙылған был әҫәрҙәрҙең тәрбиәүи әһәмиәте бик ҙур. Улар тәбиғәтебеҙ, Тыуған илебеҙ өсөн яуаплылыҡ хисе, ата-әсәләргә, халҡыбыҙға, хеҙмәткә ихтирам тәрбиәләй, матур аһәңдәре менән һәр кемде тыуған еребеҙгә, туған телебеҙгә яҡынайта, уларға ҡарата мөхәббәт уята.
Мин балалар һәм йәш ҡәләмдәштәр ижадын йыйыуға бик теләп тотондом. Түңәрәктә генә башланған эш арыу ғына бер йыйынтыҡҡа әүерелде. Нәзәкәтле телдә яҙылған был әҫәрҙәрҙең тәрбиәүи әһәмиәте бик ҙур. Улар тәбиғәтебеҙ, Тыуған илебеҙ өсөн яуаплылыҡ хисе, ата-әсәләргә, халҡыбыҙға, хеҙмәткә ихтирам тәрбиәләй, матур аһәңдәре менән һәр кемде тыуған еребеҙгә, туған телебеҙгә яҡынайта, уларға ҡарата мөхәббәт уята.
Балалар ижады менән осрашыуымдың киләсәге булыр, тип уйлайым. Мин әле уларҙың яңынан-яңы шиғырҙар, хикәйәләр, әкиәттәр яҙыуын көтәм. Был бәләкәй йондоҙҙар араһынан ҙур шағирҙар, яҙыусылар сығыр, тигән өмөт менән ҡалам. Башҡортостан халҡына Пермь өлкәһенән йәш ҡәләмдәштәр яҙмаларын бик теләп тәҡдим итәм.
Һалдат хаттары
Өсмөйөшлө һалдат хаттарын
Ҡат-ҡат уҡый әсә һыҡранып,
Нисә йылдар буйы ҡарт әсәнең
Йөрәккәйе яна һыҙланып.
Яуыз һуғыш тартып алды уның
Һөйгән йәрен, ике балаһын,
Оҙатҡанда һиҙҙеме икән
Береһенең дә кире ҡайтмаҫын?
Киттеләр ҙә һуғыш ҡырҙарынан
Өсөһө лә кире ҡайтманы.
Йәшел һандығында һаҡлана тик
Окоптарҙа яҙған хаттары.
Алина РАНҒОЛОВА,
Әржән мәктәбе уҡыусыһы.
Туҡайға
Бөрөләр асылған саҡта
Туҡай донъяға килгән.
Унда булған изге хистәр
Барлыҡ даръяға ингән.
Туҡай ағай шиғырҙарын
Бала саҡтан уҡыйбыҙ,
Тәртиптә лә, уҡыуҙа ла
Унан өлгө алабыҙ.
Шиғырҙары күңелемдә
Юйылмаҫ эҙ ҡалдыра.
“Һыу инәһе”, “Шүрәле”ләр
Онотолмаҫ мәңгегә.
Рәхмәт һиңә, Туҡай ағай,
Күп нәмәгә өйрәттең,
Һәр саҡ беҙҙең күңелдәрҙә
Ҡалыр һинең һүрәтең.
Рания УРАҘОВА,
Әржән мәктәбе уҡыусыһы.
Бесәйем
Минең бер бесәйем бар,
Исеме уның – Шайтан.
Өйөбөҙҙөң йәме бит ул,
Бик матур һәм бик шаян.
Бер уйнарға керешһә,
Тәгәрәй йомғаҡ кеүек.
Күҙҙәре ялт-йолт итә,
Уйнай-уйнай һикереп.
Мейес башына менһә,
Мырау-мырау тип йырлай.
Йылылыҡты ярата ул,
Көн буйы шунда йоҡлай.
Бер йоҡларға ятып китһә,
Уятып булмай уны.
Шулай булһа ла, бик тә
Яратабыҙ беҙ уны.
Риназ РАЙЫМОВ,
Әржән мәктәбе уҡыусыһы.
Тыуған яғым
Бер тауыш юҡ. Тынған төнгө урам.
Уттар һүнгән барлыҡ йорттарҙа.
Яңғыҙ ғына әкрен атлап барам –
Бер кеше юҡ тирә-яғымда.
Күк йөҙөндә балҡый мең йондоҙҙар,
Әйтерһең дә, ынйы һибелгән.
Йөрәктәге һағыш тамсылары
Һибелгән шул, ергә һибелгән.
Йылға аға селтер-селтер килеп,
Урман шаулай ауыл янында,
Шунда инде тынысланды күңел, Тыуған ауылымда булғанға.
Тыуған яғым – ғүмер бишегем дә,
Сихри асҡыс тормош юлымда.
Һиндә минең күңел йәшлегем дә,
Яҙмышым да һинең ҡуйыныңда.
Гүзәл КӘБИРОВА,
Төнгүк мәктәбе уҡыусыһы.
Манзара
Әкрен генә, тын ғына
Ябалаҡ ҡарҙар яуа.
Ҡышҡы тын урамдарға
Тәбиғәт юрған яба.
Иртән торһам, бар ергә
Ап-аҡ келәм йәйелгән.
Селтәр шәлгә төрөнгән
Ағастар ҙа һөйөнгән.
Йәшел шыршыларҙың да
Аҡ шәлдәр иңдәрендә.
Алыштырған өҫ-башын
Ҡуяндар үрнәгендә.
Илнария ТУҠТАМЫШЕВА,
Оҙон Ялан мәктәбе уҡыусыһы.
Тыуған еремә мәҙхиә
Ниндәй гүзәл беҙҙең Барҙы яғы,
Һауалары һулап туйғыһыҙ.
Кешеләре яҡын һәм тырыштар,
Эштәрендә һәр саҡ тынғыһыҙ.
Тыуған яғым бигерәк йәмле, яҡын
Һәм һоҡландырғыс тәбиғәте.
Урал тауҙарының итәгендә
Шаулап үҫә шыршы, нараты.
Бабаларыбыҙҙың рухын һаҡлап,
Гөрләп үтә һабантуйҙары.
Йыраҡ араларҙы яҡын итеп
Һағынып ҡайталыр яҡташтарым.
Тыуған илде, милли рухты һаҡлап,
Күкрәп үҫә моң бишегем – Барҙы.
Йәшәүҙәрем менән ошо ерҙә
Сикһеҙ бәхетле был донъяла.
Ләйсән ИШЕМОВА,
Оҙон Ялан мәктәбе уҡыусыһы.
Ауылымды яратам
Иртә тороп тышҡа сыҡһам,
Күрәм атҡан таңымды.
Баҡса башына барам да
Һөйәм нескә талымды.
Унда ҡоштар, күбәләктәр,
Бал ҡорттары ла оса.
Гүйә, улар миңә өндәшеп,
Арҡамдан һыйпап ҡоса.
Йөрөй торғас һыу буйында,
Туҡталып тып-тын ҡалам.
Ишетелгән һәр тауышты
Моңло бер йырға һалам.
Кем яратмаҫ бындай ерҙе,
Кемдең күңеле шатланмаҫ.
Бындай матурлыҡҡа бер кем
Битараф ҡала алмаҫ.
Эвелина ХӘЛИМОВА,
Сәрәш мәктәбе уҡыусыһы.
Кәрәкмәй беҙгә һуғыш
Һуғышта булған бабам,
Иле өсөн көрәшкән.
Европа илдәренә лә
Иреклек алып биргән.
Ҡан ҡойған, яраланған,
Еңеп ауылға ҡайтҡан.
Шул көндән тыуған ерҙә
Бәхет ҡояшын тапҡан.
Кәрәкмәй беҙгә һуғыш,
Тыныслыҡ булһын ерҙә.
Балалар күҙҙәрендә
Булмаһын һағыш бер ҙә.
Илмира СУҒАЛАЕВА,
Сәрәш мәктәбе уҡыусыһы.
