Башҡорт теле үҫә һәм камиллаша

Башҡорт телебеҙ артабан да камиллашһын һәм үҫешһен өсөн уның төрлө гаджеттарҙа булыуы бик тә мөһим. Ошо йәһәттән тағы ла бер проект тормошҡа ашты.

Башҡортостан Башлығы грантына төҙөлгән “Интерактив башҡорт теле-2” веб-ресурсы шуға асыҡ миҫал. Проект Башҡортостан Мәғарифты үҫтереү институтының Милли белем биреү буйынса ресурс үҙәге һәм Республика инженер лицей-интернаты тарафынан эшләнгән.

Веб-ресурсты “Үргә ос!” мәғариф проекты сиктәрендә башҡорт телен уҡытыуҙа һәм башҡорт теленән дәрестән тыш сараларҙы үткәреүҙә файҙаланырға мөмкин, ә уны ҡулланыу өсөн өҫтәлмә программалар ҡуйыу талап ителмәй – компьютерҙа һәм кеҫә телефонында асып ҡулланырға мөмкин.

Веб-ресурс 34 тематик дәрестән тора. Һәр дәрестә теманы үҙләштереү өсөн ҡыҫҡа видеоролик, русса-башҡортса тематик аудиоһүҙлек, интерактив күнегеүҙәр, ситуатив диалогтар бирелгән.

Шулай уҡ веб-ресурстың йөкмәткеһендә визуаль һүҙлек, тестар, ҡыҫҡаса грамматик белешмә урынлаштырылған.

Веб-ресурсты интернет селтәрендә табыу өсөн bashlang.ru тип яҙырға кәрәк һәм ул асылғас, артабан “Дауам ителеүсе курс” тигән төймәгә баҫып, йөкмәткеһенә инеп китергә кәрәк.

Йомғаҡлап әйткәндә, “Интерактив башҡорт теле -2” веб-ресурсы – телебеҙҙе камиллаштырыуҙа тағы бер баҫҡыс.

Фото: Гөлфирә Миңлеәхмәтова.