Азамат Тимеров, Римма Амангилдина, Зәйнетдинде бушлай тыңларға килегеҙ!

14 декабрҙә 18.00 сәғәттән 21.00 сәғәткә тиклем баш ҡалабыҙҙағы “Мега. Өфө” сауҙа үҙәгендә Башҡорт теле көнөнә арналған концерт була.

“Мега” ғәҙәттәгесә бер нисә сәғәткә ҙур башҡорт әлифбаһына әүерелә, унда популяр артистар һәм музыканттар остаздар ролендә сығыш яһай һәм баш ҡала халҡына, ҡунаҡтарға башҡорт телендәге хәрефтәрҙе, һүҙҙәрҙе хәтергә төшөрөргә һәм ятларға ярҙам итә.

Программала Х. Әхмәтов исемендәге Башҡорт дәүләт филармонияһы артистары Азамат Тимеров, Римма Амангилдина, Сәйҙә Ильясова, Әлиә Исҡужина, Артур Шәрипов, Дамир Таипов, “Тамыр” студияһы, Гөлшат Ғирфанова, Айтуған Айытҡолов, Ришат Рәхимов, “ФЭСТА” вокаль төркөмө һәм башҡалар ҡатнаша.

Өс сәғәтлек концерт программаһында бүләктәр уйнатыу һәм интерактив уйындар, “Алтын башҡорт яугирҙәре” менән фотосессия, Милли халыҡ уйын ҡоралдары оркестрының, “Зәйнетдин” этно-проектының, “Бишбармаҡ” оркестрының сығышы ҡаралған.

Башҡорт теле көнөн күңелле, файҙалы итеп, байрамса кәйефтә үткәрәйек!

Сараның үткәрелеү урыны: “Мега” сауҙа үҙәге, үҙәк ишектән инеп, каток янына килергә.