"Уҡсы ҡатай" турниры үтте

Балаҡатай районында милли йәйәнән уҡ атыу буйынса “Уҡсы ҡатай” асыҡ турниры үтте.

Башҡортостан борон-борондан ил данын һаҡлаусы ал бирмәҫ батырҙар, ил рухын яҡлаусы йырсы-сәсәндәр, аҡһаҡалдар, ил инәләре менән дан тотҡан. Үткәндәр менән ғорурланып ҡына йәшәү етмәй, ә ата-бабаларыбыҙҙан ҡалған изге мираҫты тарҡатмай, быуындар ағышында үҫтереү, бөгөнгө көндә йәш быуынға танытырға һәм киләсәк быуынға еткереү беҙҙең төп бурысыбыҙ.

23 декабрь Балаҡатай районының Яныбай ауылында милли йәйәнән уҡ атыу буйынса “Ҡатай уҡсы” асыҡ турниры үтте. Унда Балаҡатай, Ауырғазы, Ҡыйғы районындарынан 40-тан ашыу бала ҡатнашты. Беренсе тапҡыр үткәрелеүгә ҡарамаҫтан ярыш бик ҡыҙыу барҙы.

Әйткәндәй, хәҙерге көндә "Юлдаш" балалар, үҫмерҙәр һәм йәштәр клубындағы уҡ атыу түңәрәгендә 54 бала шөғөлләнә. Улар төбәк һәм регион-ара, шулай уҡ республика кимәлендә уҙғарылған бәйгеләрҙә ҡатнашып алдынғылыҡ яулайҙар. Балаҡатай данын яҡлаусы Айлина Мулланурова, Вита Носкова, Марсель Ахатов, Карина Рахимова һ. б. кеүек уҡсыларҙың уңыштары маҡтауға лайыҡ. Уларға уңыштар теләйбеҙ!

Сығанаҡ: vk.com/public206976382