"Туған телемде яҡшы белеүем менән ғорурланам”

Бөгөн баш ҡалала 9-11-се класс уҡыусылары араһында башҡорт теле һәм әҙәбиәте буйынса Төбәк-ара олимпиаданың йомғаҡлау этабы уҙҙы, унда Рәсәй Федерацияһының төрлө субъекттарынан ҡатнаштылар. Атап әйткәндә, Силәбе, Ырымбур, Һамар өлкәләренән һәм Татарстандан ун дүрт уҡыусы – тыуған төбәктәрендәге этаптарҙа еңеүселәр килде.

"Башҡорт телен беренсе кластан алып өйрәнәм. Бейеүҙәребеҙҙе, йырҙарыбыҙҙы яратам, һәр саҡ теләп башҡарам", - ти Татарстандың Яр Саллы ҡалаһы уҡыусыһы Камила Ихсанова.

Ырымбур өлкәһенән килгән уҡыусы иһә, туған телем мине тыуған ерем, тамырҙарым менән ныҡлы бәйләй, ти.

"Ырымбур өлкәһе - башҡорттарҙың тыуған ере, кесе ватаным. Шуға ла мин башҡорт телен, әҙәбиәтен оло һөйөү менән өйрәнәм һәм ата-бабаларым телен яҡшы белеүем, туған телдә аралашыуым менән ғорурланам", - ти Ырымбур өлкәһенең Төйлөгән районынан Илзидә Ҡаҙбәкова.

Бөтә донъя башҡорттары ҡоролтайы рәйесе Юлдаш Йосопов күрше төбәктәрҙән килгән бәләкәй милләттәштәребеҙгә - финалсыларға иҫтәлекле бүләктәр тапшырҙы. Тел - башҡорт халҡының мәҙәни кодына асҡыс, тип билдәләне ул.

- Туған телде белеү, ҡулланыу - меңәрләгән йылдар буйы тел формалашыу осоронда уға һалынған мәҙәни кодты өйрәнеү һәм файҙаланыу. Шуға күрә ата-бабаларыбыҙҙың телен файҙаланып, беҙ уны быуындан быуынға тапшырыуҙан тыш, күп быуатлыҡ мәҙәни традицияларыбыҙға ярашлы киләсәгебеҙҙе формалаштырабыҙ, - тине Юлдаш Мөхәмәт улы.

Туғыҙынсы класс уҡыусылары араһында Ырымбур өлкәһенән Илзидә Ҡаҙбәкова, Силәбе өлкәһенән Лилиә Абдрахманова еңеүсе булды, ә ун беренселәр араһында Эльвина Ишназарова (Ырымбур өлкәһе) иң яҡшы һөҙөмтә күрһәтте.

Фото: Бөтә донъя башҡорттары ҡоролтайы.