Бөтә яңылыҡтар
Башҡорт донъяһы
16 Ғинуар 2023, 17:30

Таңсулпан Рәсүлдең тәүге туҡталышы

Хеҙмәттәшебеҙ режиссер булараҡ төшөргән тәүге фильм халыҡ хөкөмөнә сыҡты

Таңсулпан Рәсүлдең тәүге туҡталышы
Таңсулпан Рәсүлдең тәүге туҡталышы

Фильм ата-әсәй һәм балалар араһындағы мәңгелек бәхәс тураһында. Балаларға “Яҡшыраҡ булһын өсөн әйтәм” тигән фекере менән балаларҙың күңелендәге рухи ҡиммәттәрҙе юҡҡа сығарырға мөмкин булыуын һүрәтләй.

  • Төп герой Ирек Абдуллин. Ата-әсәһе уны Лондонға уҡырға ебәрергә ниәтләй. Улдарының ризалығынан тыш башҡарылған был аҙым улдарында төрлө хистәр уята. Фильм дауамында Иректең көрәше, рухи ҡиммәттәре, йәғни туған тел, мәҙәниәт, милли үҙаң сиктәрендә стереотиптарҙы емереү һәм башҡа ҡаршылыҡтарҙы күрһәтә. Фильмда бәхәс күп урынды ала. Был таҫманы ҡараған тамашасыла илһөйәрлек тойғолары уянһын ине, шул арҡылы бөтә сиктәрҙе емереп, тамашасыларҙы бәхетле кеше итһә ине! – тигән теләктә ҡала режиссер Таңсулпан Рәсүл.

Фильмда төп ролдәрҙе И. Йомағолов исемендәге Стәрлетамаҡ драма театры артисы Ирек Ибраһимов, Гөлфинә Вәлиева Башҡортостандың урман хужалығы министрлығының диспетчеры һәм янғын һүндереү тармағының инженеры, республиканың “МиссБашМодельс” агентлығы модельеры, М. Ғафури исемендәге  Башҡорт дәүләт трама театры артисы Гөлфиә Рафиҡова, “Нектория” рок төркөмөнөң етәксеһе Ришат Сөләймәнов, режиссер ярҙамсыһы һәм актер Мирас Үҙәнбаев башҡарҙы.

Таңсулпан Рәсүл әлеге фильмды төшөргәндә тормош иптәше, З. Исмәғилев исемендәге Өфө дәүләт сәнғәт институтының өлкән уҡытыусыһы Айҙар Байтимеровтың ярҙамына рәхмәтле. Айҙар ҡурайсы ролен башҡара, администратор вазифаһын атҡара.

Хеҙмәттәшебеҙ әлеге мәлдә декрет ялында. Ике малай үҫтерә. Шуға ҡарамаҫтан, тынғыһыҙ журналист, шағирә, Ибраһим Ғиззәтуллин исемендәге әҙәби премия лауреаты күптәнге хыялы – кино төшөрөп ҡарауҙы тормошҡа ашырырға була. Былтыр Булат Йосоповтың киномәктәбендә уҡып сығып, киносценарист һәм режиссер һөнәрен ала.

Таңсулпан Рәсүлдең “Һуңғы туҡталыш” фильмы ниндәй хис-тойғолар уятты? Уй-фекерегеҙ менән уртаҡлашығыҙ.

 

Фото һәм видео Таңсулпан Рәсүлдең шәхси архивынан алынды.

Автор:Лилия Нуретдинова
Читайте нас: