Кем иң шәп килен?

Мәсетле районы башҡорттары ҡоролтайынан хәбәр итеүҙәренсә, ошо көндәрҙә Яңы Мишәр ауылы мәҙәниәт йортонда 8 Март – Халыҡ-ара ҡатын-ҡыҙҙар көнө алдынан "Суперкилен-2023" бәйгеһе үткән. Анфиса Ишмөхәмәтова был хаҡта түбәндәгеләрҙе яҙып ебәргән.

“Аҙанғол, Көршәле, Яңы Яуыш һәм Иҫке Мишәр ауылдарынан биш ҡатнашыусы иң яҡшы килен исеме өсөн көс һынашты. Яңы Мишәр ауыл биләмәһе хакимиәте башлығы Баймөхәмәт Ғүмәров сараны асып ебәрҙе һәм гүзәл заттарыбыҙҙы 8 Март менән ҡотланы, матур теләктәрен еткерҙе.

Конкурстың төп маҡсаты –  йәштәр мөхитенә ғаилә ҡиммәттәрен танытыу, ғаиләлә килендең баһаһын арттырыу, туғандар араһында бәйләнеште нығытыу, йәштәрҙе милли ғөрөф-ғәҙәттәр һәм йолалар рухында тәрбиәләү. Ярыш шарттары буйынса, бәйгелә ҡатнашыусылар үҙҙәре менән яҡындан таныштырҙы, ҡәйнәләренә рәхмәт һүҙҙәрен еткерҙе, милли кейемдәрҙә дефиле күрһәтте.

Килендәрҙең тәү сиратта аш-һыуға оҫталығы баһаланды. Бешереп килтергән милли ризыҡтарҙы ла улар халҡыбыҙ йолаларына тап килтереп тәҡдим итте. Шулай уҡ баһалама ағзалары килендәрҙең нимәгә һәләтле икәнлеген дә асыҡлай алды. “Суперкилен”дәр матур итеп йырланы ла, бейене лә, сәс үреү буйынса оҫталыҡтарын да күрһәтте. Күргәҙмәләр күҙҙең яуын алып тора ине.

Бәйгеселәрҙе Мәсетле районының "Ағинәйҙәр" ойошмаһы етәксеһе Нәзирә Әхкәмова, райондың ҡатын-ҡыҙҙар советы рәйесе Зөлфиә Ғилманшина, Мәсетле районы хакимиәтенең эштәр менән идара итеүсеһе, муниципаль райондың башҡорттар ҡоролтайы ағзаһы Анфиса Ишмөхәмәтова, шәхси эшҡыуар Юлиә Ғайсина баһаланы.
“Супер килен-2023” конкурсының гран-приһын Аҙанғол ауылынан Юлианна Кузнецова яуланы. Уға "Берҙәм Рәсәй" партияһының урындағы бүлексәһе сертификаты тапшырылды. Беренсе урынды Яңы Яуыш ауылынан Илгизә Рәхмәтуллина алды, ул Мәсетле районы "Ағинәйҙәр" ойошмаһының махсус призына лайыҡ булды. Икенсе урынға Көршәле ауылынан Ләйсән Сөләймәнова сыҡты. Өсөнсө урынды Иҫке Мишәр ауылынан Гүзәл Әүхәҙиева яуланы, ул Мәсетле районы башҡорттары ҡоролтайының махсус бүләгенә лә лайыҡ булды. Көршәле ауылынан Вероника Хәсәнова ижади килен тип танылды.

Конкурс кейәүҙәге ҡыҙҙарҙың ижади һәләттәрен тулыһынса асты, ауылдар араһында дуҫлыҡ ептәрен нығытты.

Мәғлүм булыуынса, "Айыҡ ауыл-2021" республика конкурсы йомғаҡтары буйынса Яңы Мишәр ауылы "Уртаса тораҡ пункттар" категорияһында өсөнсө урын алғайны, быйыл иһә Мәсетле районының данын Яңы Яуыш ауылы яҡлай. Ыңғай тәжрибә барыһына ла файҙаға ғына”, - тип яҙа Анфиса Ишмөхәмәтова.

Фото: Мәсетле районы башҡорттары ҡоролтайы.