Хәйбуллалар Ҡоролтайға ҙур өмөттәр бағлай

Тиҙҙән Өфөлә VI Бөтә донъя башҡорттары ҡоролтайының съезы үҙ эшен башлай. Сараға әҙерлек сиктәрендә республика райондарында һәм ҡалаларында делегаттар һайлау һәм съезд эшендә ҡатнашыу өсөн рәсми делегациялар ойоштороу буйынса дөйөм йыйылыштар (ҡоролтайҙар) уҙғарылды, бөтәһе 318 делегат һайланды. Рәсәйҙең 34 төбәгенән 171 делегат ҡатнаша. Сит ил делегациялары Бөтә донъя башҡорттары ҡоролтайы менән берлектә эшләгән йәмәғәт ойошмалары активистарынан тора: съезға 12 илдән 38 ватандаштың килеүе көтөлә.

Унда Хәйбулла районынан да ҙур делегация ҡатнаша. Башҡортостандың атҡаҙанған мәҙәниәт хеҙмәткәре, район мәҙәниәт идаралығы етәксеһе Лариса Мәмбәтова етәкләгән Хәйбулла районы башҡорттары ҡоролтайы башҡарма комитеты ла был юҫыҡта маҡсатлы эш алып бара. Райондағы йәмәғәт ойошмаларын берләштереүсе көс булараҡ, ауылдарҙы төҙөкләндереү, халҡыбыҙҙы милли рухта тәрбиәләү, төрлө проекттарҙы тормошҡа ашырыуға күп көс һала был ойошма.

“Район ҡоролтайы башҡарма комитеты рәйесе булып бары ике йыл эшләйем, әммә һуңғы съездың - Бөтә донъя башҡорттары ҡоролтайының ҡарарҙары тулыһынса тормошҡа ашырыла, тип әйтә алам. Мәҫәлән, башҡорт телен һаҡлау һәм үҫтереү, ғаилә институтын нығытыу буйынса бик күп саралар үткәрелде. Был шулай уҡ Рәсәйҙә Ғаилә йылы сиктәрендә лә ойошторолдо.

Дөйөм алғанда, башҡарма комитет активистары, йәмәғәт ойошмалары үҙ эшен көсәйтте, мәҫәлән, ҡоролтай ҡарамағында төрлө йүнәлештәр уңышлы эшләй. Үҙ сафтарын даими тулыландырып барған “Ағинәйҙәр” йәмғиәте бөтә ауылдарҙа ла тиерлек бар, улар ауыл китапханалары ҡарамағында эшләй. Уның етәксеһе булып Миңзифа Ишемғолова тәғәйенләнгән, ул үҙе лә бик әүҙем йәмәғәтсе, күп саралар ойоштора, йәмәғәт ойошмаһы төбәктәге иң ҙур һәм креатив ойошмаларҙың береһе булып тора.

Шулай уҡ район ҡоролтайы ҡарамағындағы крайҙы өйрәнеүселәр йәмғиәте ағзалары ҙур эш башҡарҙы. Уларҙың тырышлығы менән район үҙәгендә яңыртылған “Хәтер стенаһы” - Бөйөк Ватан һуғышында ҡатнашыусыларҙың исемдәре уйып яҙылған мемориал барлыҡҡа килде. Был эшкә крайҙы өйрәнеүселәр үҙ өлөшөн индерҙе, исемлектәрҙе аныҡлау буйынса ҙур эш башҡарылды, төрлө сәбәптәр арҡаһында бығаса “Хәтер китабы”на эләкмәгән йөҙҙәрсә фронтовиктарҙың исеме яҙылды.

Бөтә донъя башҡорттары ҡоролтайының башҡарма комитеты составында яҡташыбыҙ Хөрмәтулла Үтәшев эшләй. Ул - Түңгәүер ырыуы йәмәғәт хәрәкәте кураторҙарының береһе. Һуңғы йылдарҙа йәмғиәттең эшмәкәрлеге айырыуса һиҙелерлек артты, йыл һайын Урал аръяғы райондарында “Түңгәүер йыйыны” үткәрелә, әгәр былтыр Баймаҡта үткәрелһә, быйыл эстафетаны хәйбуллалар ҡабул итте, күләмле сара үткәрҙе. Форум сиктәрендә Аҡъярҙа билдәле ҡурайсы, яҡташыбыҙ Йомабай Иҫәнбаевҡа һәйкәл асыу тантанаһы булды, уға арналған китап-альбом донъя күрҙе. Был беҙҙә башҡорт ырыуҙарының тарихын өйрәнеүгә, билдәле исемдәрҙе тергеҙеүгә, мираҫты киләһе быуындарға тапшырыуға ҙур әһәмиәт бирелеүен күрһәтә.

Республикала иң ҙур һорау менән ҡулланған конкурстарҙың береһе - Бөтә донъя башҡорттары ҡоролтайы съезы ҡарарҙарының береһендә сағылған “Айыҡ ауыл”. Республика конкурсы киң масштаблы була башланы, ҡатнашыусылар күбәйҙе, хатта бүләк фондын арттырырға ҡарар ителде. Был тенденция районыбыҙҙа айырыуса асыҡ күренә һәм район ҡоролтайының эше тап шунан күренә ине, сөнки “Айыҡ ауыл” конкурсын үткәргәндә бөтә институттар - йәштәр, спорт хәрәкәттәре, “Ағинәйҙәр” клубы, ҡатын-ҡыҙҙар советтары, аҡһаҡалдар йәмғиәте, атайҙар советтары һәм башҡа йәмәғәт ойошмалары йәлеп ителде. Һөҙөмтәлә район ауылдары өс йыл рәттән призлы урындар яулай - был беҙҙең бөтә берлектәге эшебеҙгә оло баһа.

Быйыл конкурстың муниципаль этабында районыбыҙҙың һигеҙ ауылы ҡатнашты, ошо көндәрҙә үткән презентация халыҡтың әүҙемлеген күрһәтте, сәләмәт йәшәү рәүешен пропагандалауға йүнәлтелгән бик күп саралар уҙғарылды.

Ауыл китапханалары өсөн китаптар һатып алыу буйынса күп нәмә эшләнде. Йыл һайын район бюджеты мәҙәниәт өлкәһенә ошо маҡсатҡа, айырыуса фондтарҙы башҡорт баҫмалары китаптары менән тулыландырыуға өҫтәмә аҡса бүлә. Быйыл бер миллион һумға китап һатып алынды. Китапханалар өсөн матбуғат баҫмаларын да алдырабыҙ, сөнки һәр кем ауылда гәзит-журналдарҙы өйгә яҙҙыра алмай.

Район китапханаларында бөтә имидж саралары бара, улар халыҡты берләштереүсе башланғыс булып тора. Йыл дауамында китапханасылар “Рух яҙыуы” шиғри проекты сиктәрендә танылған башҡорт яҙыусыларына, шағирҙарына, танылған яҡташтарына арналған төрлө кисәләр, осрашыуҙар ойоштора. Мәҙәниәт учреждениеларының матди-техник базаһын яңыртыуҙа муниципалитет йыл һайын ярҙам итә. Быйыл бүленгән 15 миллион һумға ремонт эштәре башҡарылды, музыкаль ҡорамалдар һатып алынды.

Йыл һайын грант сараларына 500 мең һум алабыҙ. Уҙған йылда, мәҫәлән, ошо аҡсаға “Ҡорот байрамы” бренд сараһын уҙғарҙыҡ. Унда һабантуй ваҡытында 500 килограмға яҡын милли ҡорот ризығы әҙерләнек. Ул Рәсәйҙең Гиннесс рекордтар китабына инде. Быйыл башҡорт рок музыкаһын үҫтереүгә аҡса һалынды, ҙур музыкаль сара - башҡорт рок музыкаһына нигеҙ һалыусыларға арналған “Бөйөк дала” рок фестивале ойошторолдо.

Шулай уҡ оҙаҡ йылдар дауамында күрше Ырымбур өлкәһе менән хеҙмәтттәшлек итәбеҙ, унда йәшәгән милләттәштәребеҙ менән осрашабыҙ, яуап визиттары ойошторабыҙ. Май айында Орск ҡалаһына ҙур концерт, күргәҙмә менән барҙыҡ, осрашыуҙа ҡала мэры ҡатнашты. Новотроицк, Ҡыуандыҡ ҡалаһы  халҡы өсөн йыл һайын һабантуй ойошторабыҙ. Хеҙмәттәшлек киләсәктә лә дауам итер, тип уйлайым. Быйыл Өфөлә республиканың баш ҡалаһында йәшәүсе яҡташтар менән осрашыу үтте. Йылы осрашыу булды, ҙур күргәҙмә, концерт программаһы ойошторолдо, түңәрәк өҫтәл артында һөйләшеү үтте. Киләсәктә лә яҡташтар ойошмаһы сиктәрендә бындай осрашыуҙарҙы йыл һайын дауам итергә планлаштырабыҙ.

Әлбиттә, еңел булмаған осорҙа йәшәйбеҙ. Махсус хәрби операция темаһы ла ситтә ҡалмай, яугирҙәргә даими рәүештә ярҙам күрһәтелә, уларҙың әсәләре, ғаиләләре менән даими бәйләнештәбеҙ, гуманитар ярҙам туплауҙа һәр ауылдағы ҡоролтай ағзалары үҙ өлөшөн индерә.

VI Бөтә донъя башҡорттары ҡоролтайына ҙур өмөттәр бағлайбыҙ һәм ул киләсәктә башҡорт халҡының, тотош  республикабыҙҙың тормошон яҡшыртыуға, уны донъя күләмендә танытыуға, халҡыбыҙҙың үткәнен, бөгөнгөһөн һәм киләсәген йәш быуындарға еткереүҙә үҙ өлөшөн индерер, үҙ һүҙен еткерер, тигән ышаныстабыҙ",  - ти Лариса Рәшит ҡыҙы.