Үҫеш, тотороҡлоҡ нигеҙе – берҙәмлектә генә

Рәсих Хәмитов: “Радий Хәбиров, ҡәҙерле башҡорттарым, әлеге ауыр заманда миңә терәк булғанығыҙ өсөн рәхмәт, тине.  Был йөрәктән сыҡҡан һүҙ булды”.

12 - 14 декабрҙә Өфөлә VI Бөтә донъя башҡорттары ҡоролтайы бара. Унда Рәсәйҙең төрлө төбәктәренән, сит илдәрҙән делегаттар ҡатнаша.

Бөтә донъя башҡорттары ҡоролтайы Башҡарма комитеты ағзаһы, атҡаҙанған металлург Рәсих Хәмитов съездағы тәьҫораттары менән уртаҡлашты.

- Миңә Радий Фәрит улының сығышынан бер әйбер иң мөһиме булды. Республика етәксеһе «ҡәҙерле башҡорттарым, әлеге ауыр заманда миңә терәк булғанығыҙ өсөн рәхмәт” тине. Был ысынлап та эстән, йөрәктән сыҡҡан һүҙ. Ул кисә генә йыллыҡ мөрәжәғәт менән сығыш яһаны. Бик күп пландарҙы билдәләне. Артабан да билдәләнгән курсты дауам итер өсөн әлеге ауыр заманда халыҡтың терәге кәрәк. Шул ваҡытта ҡуйылған маҡсаттарҙы үтәп сыға аласаҡ.

Бөгөнгө заманда теләктәшлек, берҙәмлек ныҡ кәрәк. Күреп тораһығыҙ, сит яҡтарҙан да, хатта эстән дә баҫым көслө. Үҫеш, тотороҡлоҡ нигеҙе – берҙәмлектә генә.