Йәштәр туған мәҙәниәт буйынса белемен һынаны

Ә.-З.Вәлиди исемендәге Милли китапхана Башҡорт теле көнөнә йәштәрҙе йыйып, матур сара үткәрҙе. Кисәнең “Отҡорҙар ярышы” квиз-турниры иң ҡыҙыҡлыһы булғандыр. Бында ӨФһТУ-ның башҡорт филологияһы, шәрҡиәт һәм журналистика факультеты студенттары ҡатнашты. Улар милли мәҙәниәтте белеү кимәлендә көс һынашты.

Йәштәр башҡорт йолаларының бай мөхитенә сумып, милли кейем тарихынан алып милли аш-һыу, халыҡ ижады өлгөләренә тиклем белгәндәрен барланы. Улар тыуған яғының, туған халҡының тарихы, ғөрөф-ғәҙәттәре буйынса яҡшы хәбәрҙар икәнен күрһәтеүгә өлгәште. Квизда ҡатнашыусылар рәхмәт хатына, ә командалар татлы приздарға лайыҡ булды.

Милли китапхана үткәргән был кисә йәш быуынға ата-бабаларҙың мәҙәни мираҫын тапшырыу ни ҡәҙәр мөһим икәнен иҫбатлай, сөнки ошондай саралар арҡылы ул йәшәүен, артабан үҫеүен дауам итә.

Мәғлүмәт, фото: Ә.-З. Вәлиди исемендәге БР Милли китапханаһы.