Халҡыбыҙҙың милли геройы Салауат Юлаев һәйкәлен төҙөкләндереү буйынса бәхәстәр тынмай. Реставрация ни өсөн кәрәк, төҙөкләндереү өсөн һәйкәлде постаменттан алыу мотлаҡмы, батыр һыны үҙ урынына ҡасан ҡайтыр? Ҡурған, суйындан эшләнгән һәйкәл, скульптураны тотоп тороусы каркас ниндәй хәлдә? “Мин ҡайтырмын!” документаль фильмы ошо һорауҙарға аныҡ һәм асыҡ яуаптар әҙерләй.
Картина нигеҙендә – бихисап анализ һөҙөмтәләре, проект документтарын әҙерләү нескәлектәре, Мәскәү, Санкт-Петербург, Өфө, Ҡаҙан ҡалаларынан билдәле федераль эксперттар фекере. Архитектор, скульптор, проектлаусы, реставратор, тарихсылар күптән төҙөкләндереүҙе талап иткән һәйкәлде һаҡлап ҡалыу буйынса фекерҙәре менән бүлешә.
“Күктәрҙә осрашыуҙар” – “Мин ҡайтырмын” фильмының икенсе сюжет линияһы. Әгәр ҙә Салауат Юлаев Сосланбәк Тавасиев, 1812 йылғы Ватан һуғышында ҡатнашҡан яугир, Миңлеғәле Шайморатов һәм махсус хәрби операцияла ҡатнашҡан “Салауат” позывнойлы яугир менән осрашһа, нимә тураһында һөйләшерҙәр ине икән? Авторҙың уйланыуҙары - документаль фильмда.
– Cалауат Юлаев ролен билдәле спортсмен Эльбрус Ниғмәтуллин башҡара. Милли батырыбыҙҙы ул тәүге тапҡыр 2004 йылда “Мин үлмәнем, башҡорттар!” фильмында уйнағайны. 20 йылдан һуң Эльбрус тағы ла беҙҙең менән. Башҡа ролдәрҙе республика театрҙарының күренекле артистары башҡара, – ти ижади төркөм етәксеһе, фильм авторы Гәүһәр Батталова.
Етди эштә республика халҡы ла ихлас ярҙам иткән. Фильмды төшөрөү өсөн эшҡыуар Илгиз Йосопов бушлай вышкалы автомобилен биргән. Бындай миҫалдар бихисап.
Фильмды төшөрөүгә үҙ эшенең оҫталары йәлеп ителгән – режиссерҙар Әлфиә Арыҫланова, Ләйсән Рамаҙанова, композитор Ләйлә Андреева, дизайнер Айрат Өмөтбаев, операторҙар Азамат Даянов, Ринат Кашапов, Вадим Лобов, Урал Ғатауллин, Радик Фәтхиев һәм башҡалар.
– Сентябрҙә ижади төркөм менән һәйкәлдең өҫөнә күтәрелдек, уның эсенә инеп төшөрөргә тейеш инек. Ундағы ярыҡтарҙы, серегән урындарҙы күргәс, был уйҙан баш тарттыҡ. Һуңынан Ғәҙәттән тыш хәлдәр министрлығы егеттәре менән бергәләп күтәрелдек. Фильм өҫтөндә эшләүсе ижади төркөм үҙ иңенә ни тиклем яуаплылыҡ алыуын яҡшы аңлай. Беҙҙең картинаны ҡарап, республика халҡы сетерекле, ҡатмарлы һорауҙарға яуап табыр тип ышанабыҙ, – тип Гәүһәр Батталова үҙ фекерҙәре менән уртаҡлашты.
21 ғинуарҙа киске 9-сы яртыла БСТ телеканалында “Мин ҡайтырмын!” документаль фильмының премьераһы була.
Фильмды “Самрау” фонды БСТ телеканалы менән берлектә Башҡортостан Башлығы грантына төшөргән.
Фото: “Башкортостан” ТРК-һынан.
Мәғлүмәт: kulturarb.ru