Ҡыҙ тәрбиәләгән әсәйҙәргә шәп кәңәштәр

Халҡыбыҙ ижадында ҡыҙҙарҙы, тимәк, буласаҡ әсәләрҙе – нәҫел ебен дауам итеүселәрҙе дөрөҫ тәрбиәләү йәһәтенән бик күп матур өлгөләр тупланған. “Ир бала – йортҡа терәк, ҡыҙ бала – йортҡа биҙәк”, “Ҡыҙ байлығы – күркәм холоҡ”, “Ҡыҙы барҙың – наҙы бар”, “Ҡыҙға тәрбиә биреп, милләт тәрбиәләйһең” тигән әйтемдәр ҙә ошо хаҡта һөйләй. Былар барыһы ла – кире ҡаҡҡыһыҙ хәҡиҡәт, бер ниндәй шик тыуҙырмаған ҡиммәтле аҡыл. Әммә, заман башҡа – заң башҡа тигәндәй, бөгөнгө ысынбарлыҡ ҡатын-ҡыҙға ла икенсерәк талаптар ҡуя. Улар – ғаилә ҡотон һаҡлау менән бер рәттән әүҙем йәмәғәтселәр, һәр саҡ үҫешкә, белемгә ынтылған уңышлы хеҙмәткәрҙәр, үҙҙәрен төрлө өлкәләрҙә танытҡан камил шәхестәр. Психологтар, үҫеш белгестәре бына ниндәй кәңәштәр бирә заман ҡыҙҙарына. 

• Иң тәүҙә үҙеңде ярат.
• Әйбер кешене бәхетле итмәй.
• Был донъяла хәл итә алмаҫтай мәсьәләләр булмай. Иҫеңдә тот: “Барыһы ла үтә”.
• Үҙеңде башҡалар менән сағыштырма, улар бер ҡасан да һинең кеүек булмаясаҡ.
• Ни тиклем ныҡ ғашиҡ булһаң да, үҙ баһаңды юғалтма.
• “Юҡ” тип әйтергә өйрән, кәрәк урында был һүҙҙе әйтеүҙән ҡурҡма.
• Маҡтауҙарҙы дөрөҫ, айыҡ аҡыл менән ҡабул ит.
• Һәр саҡ намыҫлы бул.
• Һәр ваҡыт уҡырға, күберәкте белергә тырыш. Белем – бик ҙур көс.
• Иҫеңдә тот: һин бер кемдең дә шәхси милке түгел!
• Һәр ваҡыт үҙеңде яҡлай бел.
• Хаталаныуҙан ҡурҡма, хаталар кешене сыныҡтыра ғына.
• Ярҙамсыл, эскерһеҙ бул, изге эштәр күңелгә рәхәтлек бүләк итә.
• Булғанына шөкөр итә, рәхмәтле була бел.
• Ауыр саҡта, икеләнгәндә йөрәгеңде тыңла. Ул алдамаҫ.
• Кешеләргә яғымлы бул.
• Хистәреңде, үҙеңдең уй-фекереңде белдереүҙән ҡурҡма.
• Һәр нәмәлә матурлыҡ таба бел, камиллыҡҡа ынтыл.
• Күңелеңә яҡын кешеләр менән араны өҙмә.
• Күп осраҡта кешене һөйләгән һүҙенә ҡарап түгел, башҡарған эшенә ҡарап баһалайҙар.
• Илағың килгәндә – ила, күҙ йәшенән дә көс алырға мөмкин.
• Көлөү – күңел дауаһы. Рәхәтләнеп көлөүҙән тартынма.
• Тормош юлынан һәр саҡ башыңды юғары күтәреп атла. Үҙ-үҙеңә ышаныс – ҙур көс.
• Һин үҙең уйлағандан да күберәккә, ҙурыраҡҡа һәләтле.
• Беренсе булып ғәфү үтенеү – көслөләр өлөшө.
• Һүҙҙәр ярҙамында күперҙәр һалырға ла, уларҙы яндырырға ла мөмкин, шуға күрә һәр ваҡыт уйлап һөйлә.
• Өй – ул йәшәгән урын түгел, ә һине яратҡан, көткән кешеләр йәшәгән ер.
• Ҡатын-ҡыҙ һәр халәттә лә матур була ала.
• Иҫеңдә тот: тормош бөгөнгө көндән тора. Бөгөн йәшә. Кисәгене үҙгәртеп булмай, ә иртәгә ни булырын бер кем дә тулыһынса белмәй, шуға күрә тап бөгөн бәхетле бул!

Айрат Нурмөхәмәтов фотоэтюды.