Илһөйәрҙәр бында тәрбиәләнә

Бай йыһазландырылған музейҙа ошо ауылда тыуып үҫкән мәғри­фәтсе Зәки Шәмсетдин, ауыл, мәктәп тарихы, хеҙмәт уңғандары, тыуған ил өсөн алышҡан батырҙар хаҡында бай мәғлүмәт тупланған. 2015 йылда мәктәптә Салауат Һатыбаев етәкселегендә ойошто­ролған “Батырлыҡ” эҙәрмәндәр отряды бөгөн һуғыш яланында ятып ҡалған яугирҙәрҙең ҡәберҙәрен эҙләү, уларҙы ҡабаттан ерләү йәһәтенән әүҙем эш алып бара.

Былтыр улар, Бөтә Рәсәй “Хәтер вахтаһы-2019” акцияһында ҡат­нашып, илһөйәрлек, тоғролоҡ өлгөһө күрһәткән. Башҡортостан эҙәрмәндәре 15 һалдат кәүҙәһен таба. Аҙаҡ улар Советтар Союзы Геройы осоусы Шамил Әбдрә­шитовтың хәрби юлын тулыраҡ өйрәнеү маҡсатында Севастополь ҡалаһына экспедиция ойошторған.

– Шамил Монасип улы, Ырымбур өлкәһендә тыуһа ла, беҙҙең ауылда үҫә. Уның ҡаһарманлығын онот­майбыҙ, – ти Салауат Мәхмүт улы. – Ҡыҙғанысҡа ҡаршы, батыр хаҡында мәғлүмәттәр юҡ. Хәҙер уның ҡаһарманлыҡ юлын төплө өйрәнәбеҙ. Был бүлмәне уның музейы итергә әҙерләнәбеҙ.

Билдәле булыуынса, Шамил Монасип улының самолеты дошман артиллерияһы тарафынан 1945 йылдың 4 майында атып төшөрөлә. Йәш эҙәрмәндәр, батыр эҙҙәренән үтеп, уның һуңғы төйәгенә сәскә һалған.