Балаларҙың ҡыҙыҡһыныуы көслө

Етәкселек хеҙмәт һөйгәндәрҙе күрә, эштәрен юғары баһалай. Быйыл Уҡытыу­сылар көнөндә Фәнүзә Мөсифулла ҡыҙына Башҡортостан Башлығы Радий Хәбировтың Указы менән “Башҡортостандың атҡаҙанған уҡытыусыһы” тигән маҡтаулы исем бирелде.

Һыуыҡҡул ауылының сираттағы йыйылышында ҡатнашырға насип итте. Оло трибунанан сығыш яһап, юғары категориялы уҡытыусы Фәнүзә Сулпанова бына нимә тине:

– “Урындағы башланғыстарға булышлыҡ итеү” программаһы – бик уңайлы проекттар­ҙың береһе, конкурста ҡатнашыу тураһында уйланырға кәрәк. Мәҫәлән, ауыл мәктәбенең ҡоймаһын ошо республика проекты нигеҙендә тулыһынса яңыртырға мөмкин. Ә ул үҙәк урамдың байтаҡ өлөшөн тәшкил итә. Һыуыҡҡулға ингән кешенең күҙенә иң беренсе ошо ҡойма ташланыуын онотмайыҡ.

Һыуыҡҡул урта мәктәбе асылғандан алып, бында кемдәр генә ҡанат нығытмаған һәм белем эстәмәгән. Бөгөн уларҙың күптәре яуаплы вазифаларҙа хеҙмәт күрһәтә. Килә­сәктә лә балаларға дөрөҫ йүнәлеш биреү маҡсатында тап ошо белем усағында быйыл 1 сентябрҙән “Заманса мәктәп” төбәк проекты нигеҙендә “Үҫеш нөктәһе” үҙәге эшләй башлаған. Бынан тыш, райондың 8 Март исемендәге ауыл мәктәбендә лә үҙәк бар.

– Ҡыҙ һәм малайҙар һәр яҡлап үҫергә тейеш, был тәңгәлдә “Мәғариф” милли проекты беҙгә ҙур мөмкинлектәр бирҙе, – тип дауам итә һүҙен әңгәмәсем. – Тормоштан артта ҡалыу юҡ, йәһәт кенә ике кабинетты йыһазлан­дырҙыҡ, “Үҫеш нөктәһе”нең етәк­сеһен тәғәйенләнек, уҡытыусылар иһә әҙер­лек курсы үтте. Балаларҙың ҡыҙыҡ­һыны­уының көслө булыуына барыбыҙ ҙа һөйөнәбеҙ.

Көнһылыу Абдуллина – башҡорт теле һәм әҙәбиәте уҡытыусыһы. Ул ҡыҙ һәм малайҙарға башҡорт теленең нескәлектәрен өйрәтә, туған телгә ҡарата һөйөү тәрбиәләй. Көнһылыу Рәүеф ҡыҙының дәрестәрен берәү ҙә сәбәпһеҙгә ҡалдырмай икән, тимәк, уҡытыусы дөрөҫ маҡсаттар ҡуйған.

Бында етәкселек бушап ҡалған шәмбе көндәрен файҙалы уҙғарыу өсөн бар көсөн һала. Күптән түгел Башҡортостан халыҡта­рының милли йолаларын һәм ғөрөф-ғәҙәт­тәрен һаҡлау, туған телдәрҙе, әҙәбиәтте һәм сәнғәтте кластан тыш саралар ярҙа­мында үҫтереү ниәтендә этношәмбе ойошто­ролған. Бөтә кластарҙа ла, Бөйөк Еңеүҙең 75 йыллығы хөрмәтенә, Хәтер дәресе үткәрелгән, ул музейға сәфәр ҡылыу менән тамамланған. Бынан тыш төрлө тарафтарға сәйәхәттәр ҙә ойошторола. Октябрь аҙаҡта­рында үҫмерҙәр Өфөгә барған, “ВДНХ-Экспо” күргәҙмәләр комплексында “Киләсәккә билет” тигән фестивалдә ҡатнашҡан.

– Арҙаҡлы педагог һәм психолог Шалва Амонашвилиҙың “Уҡытыусы – кеше тәнен йы­лытыусы ҡояш, кеше күңелен бай фер­мент­тарға байытыусы тупраҡ. Уҡыусы­ларың­дың хәтеренә генә түгел, ә йө­рәктәренә лә белем сәс!” тигән ҡанатлы фекере ифрат оҡшай, уны тормош девизым итеп алдым. Һәр бала һәләтле, ошо турала гел ҡабат­ла­йым, – тип тамамланы һүҙен Баш­ҡортостандың мәғариф алдынғыһы Фәнүзә Мөсифулла ҡыҙы.