Хеҙмәт һөҙөмтәһе – талантлы уҡыусылар

Мөхәмәт Исҡужин исемендәге 136-сы баш­ҡорт лицейы директоры Шәмсулла Хәбибрах­ма­новтың һүҙҙәренә ҡарағанда, арҙаҡлы шәхес Мөхәмәт Исҡужин – белем усағын төҙөүгә иң күп көс һалыусыларҙың береһе. Тап Мөхәмәт Ғәле улының инициа­ти­ваһы менән 1994 йылда Өфө ҡалаһының Сипайлово биҫтәһендә башҡорт лицейы асылған.

– Сирек быуат аҙ ғүмер түгел, – тине Шәмсулла Хәбибулла улы. – Ошо ваҡыт һуҙымында төрлөһөн кисерҙек: ҡыйынлыҡтарҙы ла үткәреп ебәрҙек, тос уңыштарға ла өлгәштек. Шул ҡыуаныслы, үҙебеҙҙең йөҙөбөҙ бар, лицей тулы ҡанлы тормош менән йәшәй. Хеҙмәтебеҙҙең һөҙөмтәһе – талантлы уҡыусыларыбыҙ. Алдынғы мәктәп тырыш ҡыҙҙары һәм малайҙары, киләсәккә ҡарап эш иткән тәжрибәле педагогтары менән билдәле. Лицейҙың 20 йыллығы алдынан беренсе Президентыбыҙ Мортаза Рәхимов капиталь ремонт яһатып, матур бүләк эшләне – рәхмәтебеҙ сикһеҙ.

Башҡортостандың мәғариф министры Айбулат Хажин Башҡортостан Башлығы Радий Хәбировтың ҡотлау сәләмен еткерҙе.

Дәүләт Йыйылышы – Ҡоролтай рәйесе урынбаҫары Рөстәм Ишмөхәмәтов бер төркөм хеҙмәт алдынғыларына Почет грамотаһы тапшырҙы. Бүләкләнеүселәр араһында рус теле һәм әҙәбиәте уҡытыусыһы Нәфисә Ғәлиеваны күреү шатлыҡлы ине.

– Лицейҙа эшләү бәхете миңә лә тейҙе, – тине Рөстәм Рифат улы. – Иң бәхетле йыл­дарымдың береһе булған. Һуңынан иһә, башҡа урында директор вазифаларын башҡарғанда ошонда тупланған тәжрибәгә таяндым, төрлө идеяларға башланғыс нәҡ лицейҙа һалынған.

Белем усағы сафҡа ингәндән алып бында ниндәй генә алдынғы ҡарашлы уҡытыусылар эшләп китмәгән, әммә алты педагог – Шәмсулла Хәбибрахманов, Әлфиә Шәрипова, Луиза Моталова, Гөлсәсәк Ғәзизуллина, Нәфисә Ғәлиева һәм Дилара Ҡаһарманова әле лә лицейға тоғро.

Белем усағын төрлө йылдарҙа 1 156 кеше тамамлаған. Бөгөнгө көндә 773 уҡыусы белем ала, 51 уҡытыусы эшләй.